Ssanyu ; "Bw'onnimba oba n'ompaayiriza oncankalanya"

Muwala kulikayo mu Klezia 

Nvuddeyo.

Osabye ki

 Nneebaza Katonda okunkuuma nga ndi mulamu.

Nze mbadde mmanyi nti ogwa mu kiti kya bano ba ‘slay queen’ abeeyunira nnyo ebidongo.

Brenda Mu Kateeteeyi Ng'anyumye.

Nze nakulira mu maka ga ddiini omuli Omubulaaza ate nga ne kizibwe wange Musiisita. Nange ku lwange, Katonda ye nnamba emu wange.

Mwebale omulimu. Katonda omuweereza otya mu ngeri ey’enjawulo?

Ndi muyimbi mu kkwaaya eyimba mmisa esooka ku makya buli ku Ssande mu Klezia ya St. Augustine e Makerere.

Mbu wamma abayimba mu Klezia temusasulwa! Kati olwo ssente ezikubeezaawo oziggya wa?

Abayimba mu Klezia tuba mu buweereza era tuba tetusuubirayo musaala. Naye nze bwe natikkirwa ddiguli yange omwaka oguwedde e Makerere, nafunirawo omulimu gw’okubudaabuda abakozesa ebiragalalagala n’abeebisse mu birowoozo ku Africa Retreat Center e Naggulu. Eyo bansasula ensimbi enzindabirira.

Wakikola otya okufunirawo akalimu amangu nga waakamala okusoma

Kisa kya Katonda era buli ku Ssande kye kimu ku binkeeza okugenda ku klezia okwebaza Katonda n’okumusaba ebirala bye njagala.

Mpa ku mannya go

Brenda Akatukwasa, nzaalibwa mu disitulikiti y’e Kabaale.

Hoo..! Ye mmwe omuyimbi Nince Henry be yayimbako nti mutegeera laavu. Yeesimye oyo gw’oloopera buli mpewo lw’ekoze effujjo!

Oyo simulina.

Omalako otya n’ekiwuubaalo mu budde bwo obw’eddembe?

Ng'endako ‘out’ ne mikwano gyange.

Bufo ki obwo gye mutera okugenda?

Obufo mu kibuga obumanyi okufumba enva z’eggwanga gye tutera okukasibira mpozzi ne wooteeri ezifumba enkoko nayo tugendayo kuba empoomera nnyo. Ne ku ice cream, tutera okukasibirayo.

Olwo obiibyamu ddi?

Nze siri muntu wa bidongo mpozzi nga tulina we tugenze okuyimba nga mu klezia ne bassaako omuziki ne tuzina.

Naye okuva lwe nazze wano, ka simayiro tekakuva ku matama, ggwe onyiigako ddi?

Bw’onnimba oba n’ompaayiriza, nkulaga obunyiivu bwange.

Baako obugambo bw’owa bawala banno.

Babeere mu bulamu obumuwa emirembe ate bwe basobola nga buli kye bakola bakikola nga bakyagala so si kukikola kuba waliwo omulala akikoze.