Zari Hassan alaze omulenzi we omupya amulya obwongo n'asekerera abamwogerera
MWANA muwala Zari Hassan alaze omulenzi we omupya n'asekerera abamwogerera
Shakib ne Zari nga bali mu mukwano
By Ignatius Kamya
Journalists @New Vision
Ebigambo bizzenga biyiting'ana nti Zari yayingizzaawo omusajja omupya wabula ono abadde tavangayo mu butongole kukikakasa mu lwatu kyokka mu kiro ekyakeesezza Mmande bwe yabadde ku Garden City mu kabaga k’okuggulawo ebbaala ya B-Club yalaze bannamawulire nti Shakib Cham ye musajja we omupya.
Abadigize abamu ababadewo basoose kulowooza nti Zari atudde na mutabani we kyokka abamu babuuse babalaba batandise okuzina ng’eno bwe beekwatirira ate nga Zari bw'ayita Shakib nti “bbebi.” .
Bannamawulire olwabadde okubuuza Zari oba ono ye musajja we omupya n'akkiriza era n'agamba nti si yeyamwewangulira ng’abamu bwe balowooza wabula nti Shakib ye yamwekwanira n'amuwangula omutima.
Zari obwedda alabika nga mukkakkamu ng’ali mu kifuba kya Shakib yasekeredde abamulumbagana nti apepeya n’abavubuka abato n'abategeza nti bwebaba balaba nga Shakib tamusanira bbo bamufunireyo amusaanira nti ye yakoowa ebigambo kati anyumirwa bulamu.
Yategeezezza nga omukwano Shakib gw'amulaga bwe gyayitiridde era n'ategeeza aboogezi nti balinde mbaga mpozzi n’abaana.