Prisons yeefuze emisinde gy'eggwanga omutendesi waayo ne yeewaana
Prisons eteeka ssente nnyingi mu mizannyo era tekyewuunyisa nti emisinde gino yagiwangudde.
Ronald Musagala owa Uganda Wild Life ng'aleebya banne.
By Olivia Nakate
Journalists @New Vision
Kalenda y'ekibiina ekiddukanya omuzannyo gw'emisinde mu ggwanga ekya Uganda Athletics Federation (UAF) ey'omwaka guno ekomekerezeddwa n'emisinde gya National Track and Field Championships egyabadde e Namboole.
Emisinde gino egimaze ennaku ebbiri nga gitojjera gyakomekerezeddwa kiraabu ya Prisons egiwangudde omulundi ogwokubiri ogw'omuddiring’anwa.
Prisons okutuuka ku buwanguzi yakung’aanyizza omugatte gwa bubonero 322, Police eyamalidde mu kyokubiri yafunye obubonero 267 ate nga Uganda Wild Life eyookusatu n’efuna obubonero 86.
Abaddusi nga bavuganya mu mmita 10,000.
Omutendesi wa Prisons, Nalis Bigingo yeewaanye nga Prisons bw’eyagala ennyo ebyemizannyo kye yavudde yeefuga emisinde gino.
“Prisons eteeka ssente mu mizannyo noolwekyo okuddamu okuwangula emisinde gino tekyewuunyisa nnyo. N’omwaka ogujja mmanyi nga tujja kugiwangula,” Bigingo bwe yategeezezza.
Abaddusi kati obwanga baakubwolekeza misinde gya nsi yonna egya World Athletics Championships egy'okubeera mu kibuga Oregon ekya Amerika okuva nga July 15-24 kwossa emizannyo gya Commonwealth egy'okubeera mu kibuga Birmingham ekya Bungereza okuva nga July 28 – August 8.