Abaddusi bamusaayi muto bakubiriziddwa okukuuma empisa

Amyuka omuwandiisi w’ekibiina ekiddukanya omuzannyo gw’emisinde mu ggwanga, ekya Uganda Athletics Federation Namayo Mawerere akubirizza abaddusi bamusaayi muto okubeera n’empisa bwe baba nga baagala okubeera n’ebiseera by’omu maaso ebitangaavu mu muzannyo gw'emisinde. 

Omuddusi Ng'abuuka.

Mawere okwogera bino asinzidde mu misinde gya Kyabazinga Regional Track and Field Championships egyayindidde ku kisaawe kya Busoga University e Iganga  nga abaddusi abali mu 300 be beetabye mu mpaka zino.

“Abaddusi balina okumanya nti be beegomba nabo baaliko abato. Ssinga abaddusi abo tebaalina mpisa osanga tebandibadde ekyo kye bali leero,” Mawerere bwe yategeezezza.

Emisinde gino giddukibwa buli mwaka n’ekigenderwa eky’okuzza omuzannyo gw’emisinde mu bitundu by’e Busoga.

Abamu Ku Baddusi Bamusaayi Muto Abeetabye Mu Misinde Gino.

Abakulira omuzannyo gw’emisinde mu bitundu by’e Busoga basinzidde wano ne beemulugunya ku mbeera y’ebisaawe bye baddukiramu embi nga omuddusi alina kujja Kampala okuddukira mu bisaawe ebiri ku mutindo.

Musa Isabirye nga y’omu ku baddusi abeetabye mu mpaka zino, oluvannyuma lw’okuwangula embiro za  mmita 200 yategeezezza nga balina essuubi ery’okukiika mu misinde gya Africa. Isabirye mmita 200 yaziddukidde ssekonda 22 n’obutundu 43.