Okello abadde afuuse ensonga mu mupiira gwa Uganda yeegasse ku bannantameggwa ba Tanzania

ALLAN Okello, abadde afuuse ensonga mu mupiira gwa Uganda yeegasse ku bannantameggwa ba Tanzania aba Young Africans ku ndagaano ya myaka ebiri okuva mu bakyampiyoni ba liigi y’eggwanga aba Vipers SC.

Okello yeegatta ku Vipers ku bwereere mu 2023 oluvannyuma lw’endagaano ye ne AC Paradou eya Algeria gye yali agenze okuzannya pulo okuggwaako n’etazzibwa buggya.

Ku Lwokutaano pulezidenti wa Young Africans (Young SC), Eng. Hersi Said, yeesitudde n’ajja e Kitende n’asisinkana pulezidenti wa Vipers SC, Dr. Lawrence Mulindwa okumaliriza buli kimu ku ddiiru eno.

Kiteeberezebwa okuva mu zimu ku nsonda ezeesigika, ddiiru eno yamazeewo emitwalo 30 eza ddoola (mu za Uganda 1,080,300,000).

Okello bwe yali yeegatta ku Vipers, Dr. Mulindwa yamuwaayo emitwalo 3 eza ddoola (mu za Uganda 108,030,000) ng’entandikwa, wamu n’okumujjanjaba evviivi eryali eddwadde. Okumutunda ddoola emitwalo 30 oluvannyuma lwa sizoni bbiri zokka, ebeera bizinensi nnungi er Vipers.

Okello yeegasse ku Ceasor Manzoki (ddoola emitwalo 20) okugenda mu Darlian Pro FC eya China (2022), Farouk Miya okwegatta ku Standard Liege (ddoola emitwalo 40) mu 2016, Moses Waiswa n’abalala abakyasinze okukolera Vipers ddiiru ensava.

Okello abadde n’omutindo omulungi, awangulidde Vipers ekikopo kya liigi, ekya Stanbic Uganda Cup, yeetisse Cranes ttiimu y’eggwanga mu mpaka za CHAN n’eza AFCON eziyindira e Morocco wadde Uganda teyavudde mu kibinja.

Bannayuganda abalala abaali bazannyiddeko mu Young African eya Tanzania kuliko; Steven Bengo, Emmanuel Okwi, Diego Hamis, kapiteeni wa Cranes aliko Khalid Aucho.