"Mujje n'ekisero mwe munaateeka ggoolo ze tugenda okubakuba"

YUNIVAASITE y’e Bugema eraalise Makerere University Business School (MUBS) okujja n’ekisero kya ggoolo ze bagenda okumira mu nsiike esooka eya ‘quarter’ mu Pepsi University Football League.

Bali ku kisaawe e Bugema bannyinimu we batannakubirwa mupiira gwonna sizoni eno ate tebannateebwamu ggoolo yonna awaka, bateebeddewo omugatte gwa ggoolo 11 mu mipiira esatu gye bakyalizzaawo.

Abazannyi Ba Ttiimu Ya Mubs.

Baawuttuliddewo yunivaasite y’e Kabale ggoolo 6-0, University of Kisubi (Unik) baagitimpudde 5-0 n’amaliri ga 0-0 ne Uganda Martyrs Nkozi abalina ekikopo kya sizoni ewedde.

Mu mipiira 6 gye baakazannya sizoni eno mu liigi ya yunivaasite, Bugema y’erina likodi y’omugatte gwa ggoolo ennyingi 18, bateebeddwamu ggoolo 3-1 bwe baali bakubwa Nkozi mu nsiike eyaggulawo sizoni.

Bwe baatuuse mu mizannyo gya AUUS egibadde ku UCU e Mukono mu December w’omwaka oguwedde, baavuddeyo nga be basinze okuteeba omugatte gwa ggoolo ennyingi 13 mu mipiira 7.

Sulaiman Ssentongo Owa Bugema Ku Kkono Ng'attunka Ne Hussein Kayemba Owa Ucu

Baakubye Bishop Stuart ggoolo 5-0, Mbarara University of Science and Technology (MUST) bagiwuttudde 5-0, University of Soroti baagimezze 2-0, Kampala University 0-0, baawanduddemu UCU abategesi 1-0 ku ‘quarter’, Nkumba baagiggyeemu ku penati (5-4) ku semi oluvannyuma lwa 0-0 ku semi, n’ekubwa UMU ku fayinolo penati 8-7 oluvannyuma lw’okugwa amaliri ga 0-0.

Omutendesi wa Bugema, Meddie Nyanzi agamba nti baagala ‘quarter’ kugimalira waka nga bateeba ggoolo eziwerako mu nsiike esooka olwo badding’ane nga banoonya maliri gokka.

 “Teri ttiimu gye tugenda kukkiriza kutujoogera waka era MUBS ejje nga yeenywezezza kuba abazannyi baswakidde nga Enswera enkubeko,” Nyanzi bwe yategeezezza.

Bugema baaviiriddwaako omuzibizi waabwe Donald Wafula eyeegasse ku URA FC mu liigi ya babinywera wabula omutendesi ttiimu yaggyongeddemu omuzibizi Felix Wafula n’omuwuwuttanyi David Warid.

Omutendesi wa MUBS William Kasozi abaanukudde nti omupiira guzannyibwa eddakiika 90. “Ebigambo si bye bizannya omupiira ate ebyafaayo si kyakulwanyisa, tujja kunona buwanguzi,” Kasozi bwe yategeezezza.

Wabula, ono agenze n’eddibu lya kapiteeni Silvesta Andama ne ggoolokippa abadde nnamba emu wa MUBS, Andrew Otyeng abaamalirizza okusoma.

Mu mipiira esatu gye bakyadde sizoni eno, bakubiddwa IUIU ggoolo 2-0 ne bawangula Victoria University 3-1 ne YMCA 1-0.

Ttiimu zombi zisisinkana mulundi gusooka mu liigi ya yunivaasite wabula mu December wa 2022 beesanga mu kibinja ky’emizannyo gy’omu buvanjuba bwa Afirika e Ndejje ne bakola maliri 0-0.