Baddiifiri mu gwa Kyambogo ne Muni, Poliisi ebawonyezza okugajjambulwa mu mpaka za University

Eggulo (Lwakuna) mu liigi ya yunivasite

Kyambogo 1-0 Muni

Leero (October 6, 2023)

Victoria University – YMCA, Kabojja

Enkya (October 7, 2023)

KIU – Kumi, Kirombe

DDIIFIRI Vincent Kavuma ng'ayambibwako Joyce Atuheirwe ne Ismail Matovu ku katambaala baawonye okugajjambulwa abawagizi n’abazannyi ku kisaawe e Bbanda, Kyambogo bwe yabadde ewangula yunivasite y’e Muni (1-0) mu Pepsi University Football League.

Gwabadde mupiira gwa mbiranyi nnyo okuva ku ddakiika esooka, bakira ddiifiri ffirimbi agikommonta yeegendereza anti nga buli kisobyo ky’asala naddala nga kiri kumpi ne ggoolo y’omulabe ng’abawagizi beeyiwa mu kisaawe okuwakanya ekyawadde Kavuma akaseera akazibu okumalako eddakiika 90.

Enjuuyi zombi zaabadde zikyalemaganye 0-0 wakati mu bunkenke, wabula mu ddakiika eya 80 Kyambogo yafunye ‘Freekick’ ku luuyi lwa kkono okumpi n’ekkoona lya ggoolo ya Muni.

Ekyewuunyisa omupiira bwe gwasimuddwa, gwabadde gugenda bweru ku ggoolo ya Muni, omuwagizi n’agukoonamu ne gugwa ku kigere ky’omuzannyi wa Kyambogo Hudson Mbalire eya guteebye olwo enduulu n’olutalo ku ddiifiri we byatandikidde.

Empaka za University

Omupiira gwayimiridde okumala eddakiika ezisukka mu kkumi nga ddiifiri yeebulunguluddwa abazannyi ba Muni n’abawagizi nga baagala okumulya obunyama, okutuusa Poliisi ya Kyambogo bwe yabiyingidde okumutaasa n’eggoolo n’agibala.

Oluvannyuma Poliisi yafulumizza abawagizi ebweru w’ekisaawe, embeera n’edda mu nteeko, omupiira ne guzannyibwa okutuusa bwe gwawedde wabula abawagizi ba Muni beeweze okwesasuza Kyambogo ku lunaku lw’egenda okubakyalira ewaabwe mu Arua.

“Buno obubbi bwa nkukunala, obwedda twemulugunya ku bawagizi ba Kyambogo abaabadde beebulunguludde ggoolo yaffe okulemesa ggoolokippa waffe naye ng’abaserikale ne ddiifiri tatufaako okutuusa bwe tukubiddwa ggoolo ey’ekibbi naye tubalinze mu Arua,” Ronny Atiku atendeka Muni bwe yategeezezza.

Omutendesi wa Kyambogo Christopher Lobbo yeewunyizza embiranyi Muni gye yataddewo mu mupiira guno wabula ebya ggoolo ey’ekibbi yagaanye okubyogerako.

Leero Victoria University enoonya wiini esooka sizoni eno ng’ekyazizza Young Men’s Christian Association (YMCA) Comprehensive Institute mu nsiike ya ttiimu zombi eyookubiri mu kibinja B ekikulembeddwa MUBS n’obubonero 6 mu mipiira ebiri.