‘Temukulembeza kya kugula ngoye, kulya na kunywa mwenge wabula mulongoose emitima gyammwe’

Bya Paul Galiwango

ABAKRISTAAYO bakubirizidwa obutakulembeza kya kugula ngoye, okulya n'okunywa omwenge wabula bafeeyo nnyo okulongoosa emitima gyabwe naddala mu kaseera kano nga balindirira amazaalibwa ga Mukama waffe Yesu Kristu.

Bino byayogeddwa Omusumba w'obusumba bwe Kanyanya Rev. Fredrick Lubega ku Kkanisa eyabbulwamu omutukuvu John ku mukolo kkwaya y'ekkanisa ezikola obusumba bwe Kanyanya eya  ''parish choir'' nga eri ,wamu ne kkwaya ya All saints okuva e Kalambi mu Busumba bw'e Bbira wamu ne Kkwaya ya Medik okuva mu Busumba bw'e Ndejje kwe zayimbidde ennyimba z'Amazalibwa wakati mu kunyaanyagiza amaloboozi .

Rev. Lubega yategeezeza  nti kino kiseera kyakwetekateka eri abakiriza Yesu agenda okuzaalibwa abasange nga balongoofu era nga beeteseeteese n'abasaba okufaayo okulongoosa emitima gyabwe.

Yategeezeza nti ennyimba z'Amazaalibwa ziyamba abantu okwelongoosa olw'obubaka obuzibeeramu, n'asaba abantu okwegatta ku kkwaya ez'enjawulo naddala abavubuka.

Yasabye Bannayuganda okufaayo ennyo n'okubeera abeegendereza nga bavuga ebidduka beewale okuvuga endiima n'okupapa mu biseera byennaku enkulu, okusobola okwewala obubenje obuyinza okusaanyawo obulamu bwabwe.

Carol Damulira Ssentebe W' Akakiiko Akafuzi Aka Kanyanya Parish Kkwaya Ng'ayogera.

Rev. Lubega era yasabye Bannayuganda okufaayo ennyo okwekuuma n'okubeera kubulindaala okwekuuma eri ebikolwa by'obumenyi bw'amateeka ebitera okweyongera mu biseera bino ebyennaku enkulu ng' ababbi bangi beesoma okubba.

Carol Damulira ssentebe wa akakiiko akafuzi aka Kanyanya Parish kkwaya yasabye abantu buli lunaku okulufuula olw'enjawulo mu bulamu bwabwe nga bassaawo essanyu okusinga okwekubirizanga.

Ddamulira yategeezeza nti buli muntu asaanye okubaako ky'agenderera mu bulamu bwe n'ategeeza nti omuntu tasaanye kusanyusa bantu wabula okusanyusa Katonda kuba obwa Kabaka bwa Katonda buwaguzibwa buwaguzibwa n'asaba abayimbi obutabeera nga bipande nga bayimba ennyimba  ezirimu obubaka obukyusa abantu wabula nabo bakolere ekkubo eribatwaala mu ggulu.

Kkwaya Ya Medik Ng'eyimba Ennyimba Ez'enjawulo Ez'amazaalibwa Ku Kkanisa Ya St. John Kanyanya.

Kkwaya Ya All Saints Okuva E Kalambi Mu Busumba Bw'e Bbira Ng'esanyusa Abantu .

Ono akubirizza abavubuka okwenyigira mu mirimu gy'ekkanisa  bagisanyukiremu  ng'okuyimba n'ategeeza nti tebasaanye kutya kuba buli kimu bakiyiga nga n'okuyimba basobola okukuyiga n'asaba abakulira akakiiko ka akafuzi aka kkwaya ya Parish Choir okuli n'eyali omukunganya w'olupapula lwa Bukedde Godfrey Kulubya okuyamba ku kkwaya okusobola okussa enyimba zaayo ku lutambi.