Pulezidenti Museveni asabidde Migadde akalulu

PULEZIDENTI Museveni acamudde abatuuze ku kizinga ky’e Buvuma bw'abasuubizza nti mu kisanja ekiddako agenda kubongera konsitityuwesi kubanga akizudde nti emu gye balina baabaseera.

 

N’agamba, kijja kubayamba okubakulaakulanya mu ntegeka za Gavumenti ez'okubayamba.

Pulezidenti Ng'akwasa Migadde Bendera

Yabasuubizza nti agenda kulaba nga konsitityuwensi yaabwe esalibwamu kyokka n’abanenya kuba abamu babadde ku ludda lw’ebyobufuzi olukyamu.

Musevrni yasabidde omubaka Robert Migadde Ndugwa akalulu n’agamba nti bamulabire ddala kubanga musajjawe mulungi ate alina obuvunaanyizibwa obw’enjawulo nti ne mu Palamenti gye bamusindika amanyi okuteesa ate mukozi.

"Migadde musajja mulungi nnyo ate muwulize era mwesiga. Mumulonde, atuyambye nnyo naddala mu bitundu bya Buganda,” Museveni bwe yabasabye. 

Omubaka Migadde y’akulira ekisinde kya Buganda ekinoonyeza Pulezidenti Museveni akalulu era yasiimiddwa nti omulimu agukoze bulungi ne banne okuli Ssaabawolereza wa Gavumenti Kiryowa Kiwanuka, Ruth Nankabirwa, Cissy Namujju, Sylvia Nayebale n’abalala. 

Yayogeddwaako nti akoze kinene okuzza obuwagizi bwa Museveni ne NRM mu bitundu bya Buganda era bakakasa nti agenda kuwangulira waggulu akalulu ku Lwokuna.