POLIISI erabudde abantu okubeera obulindaala mu biseera bino eby’ennaku enkulu

POLIISI erabudde abantu okubeera obulindaala mu biseera bino eby’ennaku enkulu era babaloopere n’abo bonna abenyigira mu mize gy’obumenyi bw’amateeka basobole okukwatibwa.
Bino byogeddwa akulira Ekitongole kya poliisi n’omuntu wabulijjo AIGP Ubaldo Bamunoba bw’abadde yetabye ku mukolo poliisi w’esisinkanidde abantu ba bulijjo e Kyanja ku kanisa ya St. Mark Kakumba C.O.U okutema empenda ku ngeri gyebayinza okutema empenda okunyweza eby’okwerinda n’okusalira awamu amagezi ku nsonga ezibasomooza.

Aba poliisi nga basomesa abatuuze okuzikiza omuliro

Bw’abadde yetabye ku mukolo guno ogwategekeddwa ku mulamwa gw’okuziba omuwatwa wakati wa poliisi n’omuntu wabulijjo mu kulwanyisa obumenyi bw’amateeka, nga gwatandise n’okukuba bandi okwetoloola Kyanja, Bamunoba yalaze obwennyamivu olw’emize egyeyongera ennyo mu biseera by’ennaku enkulu n’alabula abantu okwongera okwerinda n’okutambulira awamu ne poliisi.
Yategezezza nti nga tunyweza eby’okwerinda, omuntu tasaanye kulinda piliisi kubanga eby’okwerinda bitandikira ku muntu yennyini.
Awadde eky’okulabira eky’abantu abasirikira abantu abenyigira mu bumenyi bw’amateeka nti bano bakola kinene nnyo okutumbula emize gino.
Alabudde abo bonna abasirika nga emize gy’obumenyi bw’amateeka gigenda mu maaso n’ategeeza nti bano nabo besimirako ttaka kubanga omumenyi w’amateeka bw’aba atulugunya abantu tayawula mu mawanga, ddiini, kikula wadde endabika n’ategeeza nga abasirika nabo bwebajja okukosebwa.
Alabudde abantu obutenyigira mu fujjo lyonna naddala mu kiseera kino eky’obululu era bagondere amateeoa gonna agateekebwawo kubanga singa tebaakikole bajja kuvunanibwa mu mbuga z’amateeka.

Akulira poliisi n'omuntu wabulijjo Ubaldo Bamunoba (ataddeko galubindi) n'abalala nga bakumba

Aduumira poliisi ya Kira Road, SP Sam Suubi yategezezza nti nga abantu bali mu kiseera eky’ebyobufuzi balina okwewala okubitabika n’obumenyi bw’amateeka kubanga ensonga z’ebyokwerinda teziriimu kwawulayawula.
Ku bantu abagenda okusanyuka mu nnaku enkulu, Suubi abawabudde obutatambula bonna kuggwawo ewaka nga nebwebaba baweddewo bategeeze ku baliraanwa baabwe kiyambeko okubakuumirako ewaka obutabbibwa.
Abatuuze abetabye ku mukolo guno nga bakulembeddwamu ssentebe wa Kyanja Central Zone, Sulaiman Mawejje ne Grace Kamoga basiimye nnyo enkola poliisi gy’etandise okuddako mu bantu okuwuliriza ebibasomooza era nebabasaba okugenda mu maaso n’enkola eno.
Kamoga asabye poliisi ebongere emisomo ku by’okwerinda n’amateeka kubanga abamu besanga bazizza emisango olw’obutamanya.
Oluvannyuma abatuuze basomeseddwa ku ngeri y’okutangira n’okuzikiza omuliro singa gubeera gukutte nga akamu ku bubonero obw’okunyweza eby’okwerinda.