Ow'emyaka 5 asirikkidde mu muliro ogukutte akazigo n'afa ng'alaajanira nnyina okumutaasa!

OMWANA ow’emyaka etaano afiiridde mu muliro ogwakutte enju n’afa ng’alaajanira nnyina okumutaasa, ekitaasobose.

Entiisa eno yabadde mu UEB zzooni mu muluka gwa mulago II omuliro ogugambibwa okuba nti gwavudde ku masannyalaze bwe gwakutte  emu ku nju okukkakkana nga Britney Kainza 5,alusuddemu akaba!

Ono abadde wa muyizi ku ROSA Kindergarten erisangibwa e Mulago ng’abadduukirize baakoze ekisoboka okutaasa omwana eyabadde mu kinaabiro ky’omu nju ng’anaaba  mu kiseera omuliro gwe kwatidde.

Eddie Kiggundu  omu ku baazikizza omuliro yagambye nti  baasoose kulaba masannyalaze nga gabwatukira ku muti oluvannyuma baalabye omukka nga guva mu muzigo ogumu.

Yategeezezza nti abantu badduse okugenda okulaba ogubadde  kyokka baasanze enju ekutte omuliro  baakutudde payipo ezitambuza amazzi ne batandika okuguzikiza naye omwana tebaasobodde kumutaasa kuba yabadde  mu kiyigo ng’ate omuliro gwabadde gumaze okusaasanira enju .

Yagasseeko nti omuliro gwakutte ku ssaawa 1:30 ey’akawungeezi  nga mmotoka y’omuliro yatuuse mu bwangu n’eziyiza omuliro okusaasaanira emizigo emirala n’amayumba agaliraanyeewo.

Zaina Mutuwa  maama w’omugenzi yagambye nti mu kiseera omuliro we gwakwatidde  yabaddewo  awaka ng’atudde wabweru  kyokka teyasobodde kutaasa mwana we.

Stephen Munyosi   taata w’omugenzi yagambye nti kati basigazza abaana 2, kyokka baamukubidde essimu ng’ali wala yagenze okutuuka ng’omwana we afudde ng’ebintu byonna talina kyatasiddwamu.

Omugenzi waakuziibwa  ku kyalo Rwalera mu ggombolola y’e Bungoko mu muluka gw’e Bubirabi  mu disitulikiti y’e Mbale .