Omusawo omukugu mu mannyo mu ddwaaliro e Iganga akabenje kamusse

Bya Ivan Wakibi

AB'EBYOBULAMU  e Iganga bali mu kiyongobero oluvannyuma lw’okufa kw’omusawo omukugu abadde akulira eby’amannyo ku ddwaaliro ekkulu e Iganga Dr. Paul Muwanguzi. 

Muwanguzi abadde amaze ebbanga nga yakulira n’okwebuuzibwako ku nsonga z'amannyo mu ddwaaliro lino yafiiridde mu kabenje ku luguudo oluva e Manafa okudda e Sironko bwe yabadde atambula mu biseera bya Ssekukkulu, okusinziira ku mwogezi wa disitulikiti y’e Iganga, Daniel Saire

Saire agambye ng’ ekyokufa kw’omukozi ono bwe kibakubye wala kubanga abadde wa mugaso nnyo ku nsonga z’ebyobulamu naddala ebikwatagana n’abalwadde b’amannyo.

Akulira ebyobulamu mu disitulikiti y’e Iganga, Dr. Patrick Kitimbo akakasizza okufa kw’omukozi waabwe  gw’agambye nti aleseewo eddibu ery’amaanyi kubanga omusawo onno abadde n’obuyigirize n’obumanyirivu bw’amaanyi ku nsonga z'amannyo.

Kitimbo ategeezezza ng’ abalwade ababadde balemerera abasawo ku malwaliro ag’enjawulo mu disitulikiti eno ne disitulikiti endala eziriraanyewo nga Luuka, Kaliro, Namutumba ,Mayuge n’endala babadde babasindika mu ddwaaliro lino, omugenzi n’abakolako ne bawona bulungi

Ssentebe wa disitulikiti y’e Iganga, Ezera Gabula agambye nga bafunye eddibu eryamaanyi mu byobulamu nga tamanyi oba banaafuna dokita omulala abadde akola ng’ omugenzi.