OMUSAJJA abadde agezaako okutaasa abalwana bamutemyetemye ne bamuttira emanju w'amakaage

OMUSAJJA abadde agezaako okutaasa abalwana, bamutemyetemye ne bamuttira emanju w'amakaage.

Attiddwa ye Francis Mpumwiire 53 omutuuze w'e Kyabanyoro cell mu muluka gw'e Nyabikungu mu Ggombolola y'e Rugando mu disitulikiti y'e Rwampara.

Kitegeezeddwa nti ku Lwomukaaga Nibert Akandwanaho yalwanaganye ne Gerald , nga Nibert alumiriza Gerald okunywa omwenge gwe ogwakaliga ogwabadde mu ccupa.

Omugenzi Mpumwiire yagezezzaako okubataasa n'abakakkanya, nti kyokka Gerald nakima ejjambiya okuva ewuwe  okugezaako okwagala okutema Nibert kyokka era omugenzi n'agimuggyako ekyayongedde okunyiiza Gerald era bombi n'abewererera.

Ensonda zitegeezezza nti oluvannyuma, Mpumwiire asangiddwa mu kitaba ky'omusaayi emabega w'ennyumba ye ng'attiddwa era poliisi e Rwampara nga yeyambisa embwa, ekutte Gerald nga n'omulala Bonny Ayesiga agambibwa okuba ng'adduse era nga naye bamuyigga.