Bannaddiini bakyadde ewa Kyagulanyi, Barbie n’attottola embeera gy’ayitamu nga bba yeekukumye

BANNADDIINI bagenze e Magere mu maka ga Pulezidenti wa NUP Robert Kyagulanyi Ssentamu, mukyala we Barbie n’abattottolera embeera ey’okutya n’akasattiro ke balimu okuva bba lwe yeemulula ng’amagye gabasazzeeko.
Ssaabalabirizi w’ekkanisa ya Uganda, Dr. Stephen Kazimba Mugalu ye yakulembeddemu Bannaddiini abeegattira mu kibiina ekitaba enzikiriza ekya Inter-Religious Council of Uganda okwabadde eyali omumyuka wa Ssaabasumba w’Essaza ekkulu erya Kampala Msgr. Charles Kasibante, Omutume Joseph Sserwadda, n’abalala.
Ekkubo erituuka ewa Kyagulanyi terikyalimu misanvu, kyokka abaserikale baasembedde ku ggeeti n’okwetooloola ekikomera, nga buli ayagala okuyingira basooka kukuba ssimu ne bafuna olukusa olumukkiriza okuyingira.
Barbie yagambye Bannaddiini nti, abaserikale bakyetoolodde amaka gaabwe, era tewali gwe bakkiriza kufuluma mu nnyumba, ekintu ekibamazeeko emirembe, n’okuyingirira obulamu bwabwe obw’ekyama.
Yabaloopedde nti, tebakyebaka, kubanga poliisi erina obunyonyi obuwoggana ennyo ekiro ne bubalemesa okwebaka. Emmere nayo nti yabaweddeko naye Itungo bwe yagezaako okufuluma anoonyeze ab’awaka ekyokulya abaserikale baamugaana okufuluma, era n’abagamba nti, y’ensonga lwaki nabo teyabawadde byakulya kuba tabirina. 

Bwe baavudde ewa Kyagulanyi, Bannaddiini baayogeddeko eri ab’amawulire ne bagamba nti, babadde bagenze kusabira ku ffamire ya Kyagulanyi, n’eggwanga lyonna okulaba nga libeeramu emirembe.
KYAGULANYI AWERA
Bannaddiini we baagendedde ewa Kyagulanyi, nga Bannayuganda beebuuza kifo ki ekituufu gye yeekukumye nga gy’asinziira okuwa obubaka ku mikutu gya Social Media omuli n’okuwanyisiganya ebisongovu n’omuduumizi wa UPDF, Gen. Muhoozi Kainerugaba eyawandiise obubaka obukambwe ku mukutu gwa ‘X’ nga yeewerera Kyagulanyi gwe yasalawo okuyita ‘kabobi’.
Mu mboozi ez’akafubo Kyagulanyi ze yabaddemu n’emikutu gy’amawulire egiri ku mutendera gw’ensi yonna okuli Aljazeera ne BBC, yagambye nti, yadduka awaka we oluvannyuma lw’okufuna amawulire nti, ab’ebyokwerinda baali baagala kumukwata, n’addukira mu kifo ekirimu obukuumi obumala agira abeerako eyo.
Era yavudde awaka nti, ng’ayagala afune omukisa ogwogera ne Bannayuganda, kubanga ewuwe buli abaserikale bwe babeerawo basalako amayengo nga tasobola kuweereza bubaka bwe eri bantu.
KIKI KY’AZZAAKO?
Kyagulanyi bwe yabadde mu mboozi ey’akafubo n’omukutu gwa BBC yagambye nti, ebyava mu kulonda tabikkiririzaamu, kubanga alina obujulizi ng’abantu abagambibwa okuba ab’akakiiko k’ebyokulonda baatikinga obululu.
Wabula yakikkaatirizza nti, tagenda kutwala musango mu kkooti, kubanga kkooti tazirinaamu bwesige nti zisobola okumuwa obwenkanya, era ye akyakalambidde ku kya Bannayuganda okwetikka obuvunaanyizibwa bw’okubanja obuwanguzi bwabwe.
Bwe yabuuziddwa nti, ayagala Bannayuganda obuwanguzi babubanje mu ngeri ki? Yazzeemu nti, mu ngeri ez’emirembe, n’awa eky’okulabirako nti, ye yakwatanga bendera, era bendera n’efuuka ensonga naye nga talina gw’alumizza, wadde okubaako ekintu ky’omuntu ekyonoonebwa.