BESIGYE : Ab’ekkomera boogedde ku bulwadde obwamutwazizza mu ddwaaliro

DR. Kizza Besigye, atwaliddwa mu ddwaaliro oluvannyuma lw’okugwaamu embiro n’okusesema, aba ffamire ye ne basattira.
Kyokka omwogezi w’ekitongole ky’amakomera, Frank Baine Mayanja, agamba nti, embeera ya Besigye teyeeraliikiriza nnyo nga mukyala we, Winnie Byanyima bwe yabadde agamba newankubadde nga baamututte ew’omusawo we n’afuna obujjanjabi.
Baine yagasseeko nti, kituufu Besigye ye yasabye okutwalibwa ewa dokita we, okwongera okumwekebejja era nga kino kizze kikolebwa buli luvannyuma lwa mwezi.
Yagasseeko nti, lipooti okuva mu basawo yalaze nti, kati embeera ye eri yadde yaddeko, era ng’agenda atereerera ddala.
Kyokka Byanyima, yategeezezza bannamawulire nti, abakulira ekkomera ly’e Luzira, bazze balemesa bba okusisinkana dokita we, nga beekwasa nti, balina abasawo abakugu abamala, abasobola okukola ku Besigye, n’atereera era n’addawo.
Byanyima agamba nti, ku lunaku lw’okulonda, lwe yasooka okusaba ab’ekkomera okukkiriza bba akeberebwe dokita we ne bagaana, kyokka yabadde ali awo ng’afuna essimu okuva eri omusawo waabwe, ng’amutegeeza nti, kyaddaaki bba yabadde atwaliddwaayo okujjanjabwa ate ng’embeera mw’ali tewoomya nnakabululu. Yagambye nti, yagenze enkeera mu ddwaaliro gye yasanze Besigye nga yenna munafu ebitagambika, ate nga bamutaddeko abamukuuma nga bajaasi so si baserikale b’amakomera, ekintu ky’agamba nti, kimenya amateeka.
“Nnamusanze mu mbeera mbi ne mmukuba n’ekifaananyi okukuuma obujulizi ku mbeera entuufu gy’alimu”, Byanyima bwe yagambye.
Besigye yaakamala mu kkomera omwaka mulamba n’omwezi mulamba okuva lwe yakwatibwa e Kenya mu December 2024 n’omuyambi we Obeid Lutale, ne baggulwako emisango gy’okulya mu nsi yaabwe olukwe.