Omubaka Sarah Opendi aweze okuttukiza etteeka ly'omwenge

OMUBAKA omukyala owa disitulikiti y'e Tororo Sarah Opendi aweze okuddamu okuleeta ebbago ly'etteeka ly'omwengo mu ntuula za Palamenti okutuusa bw'anakkirizisa babaka banne okuliyisa lifuuke etteeka kiyambeko mu kutangira abantu okumala ganywa omwenge mu ngeri y'ekyeyononere mu kifo ky'okwenyigira mu kukola.

Opendi okuddamu okuzuukusa ensonga eno kiddiride okunoonyereza ku nsabika y'omwenge okwakoledwa abakenkufu mu yunivasite e Makerere nga bali wamu ne bannaabwe aba yunivasite y'e Malawi okulaze nti singa gavumenti tefaayo kuweerere ddala mwenge gutundibwa mu bucupa obutono ku ssente entono ddala kyandiviirako abantu abamu ku lukalu lwa Africa okufuukira ddala abanywi bawaddanga.

Okunoonyereza kuno okwakolebwa wakati w'omwaka 2022 ne 2023 mu distulikitti y'e Gulu ne Wakiso okufulumizidwa olwa leero mu Kampala kulaze nti ekya gavumenti ya Uganda okubeera nti yasooka n'ewera omwenge gw'obuveera kyali kirungi nnyo era kyali kikendezeza ku bawaddanga naye ate kati embeera yandyongera okwonooneka olwa abakola omwenge ate okutandika okuguteeka mu bucupa obutono ddala ate ku ssente entono.

Omubaka Sarah Opendi wakati n'abakenkufu mu by'okunoonyereza ku mwenge

Minisita Opendi asabye abantu bamutegeere bulungi nti ekigendererwa kye si kyakulwanyisa mwenge yadde okulwanyisa kkampuni ezigukola wabula ayagala wabeewo embeera etangira abantu okugunywera mubiseera eby'okukola saako n'okunywa omwenge ogutabikidwamu ebiragalalagala.

Polof. Nazarius Mbona Tumwesigye omusomesa musomero ly'eby'obulamu ku yunivasite e Makerere omu kubawoma omutwe mu kunoonyereza kuno akkaattiriza nti baagala amakolero agasabika omwenge mu bucupa obutono nago gatekebweko ekkomo.

Ono era yeemulugunyiza ku bika by'amannya agatumibwa omwenge nga agamu gaviirako okuwaga abagunywa ne balowooza nti bamanyi nnyo nga go.

Dr . Isabella Uny , omukuggu mukunoonyereza okuva ku yunivasite ya Stirling mu UK yategeezeza nti okunywa omwenge mu ngeri etali ya buvunaanyizibwa ng'oggyeeko okuzing'amya ebyenkulaakulana kiviirideko n'abagwettanira okukwatibwa endwadde ezitasiiga nga Sukaali , puleesa , kookolo n'endala nnyingi , n'olwekyo abakulembeze ku lukalu lwa Afrika basaanide basitukiremu okunogera okusomoozebwa kuno eddagala .