Poliisi y'ebidduka ekutte baddereeva 84 ku by'okuvuga nga batamidde

POLIISI y’ebidduka mu Kampala ekoze ekikwekweto mw’ekwatidde n’eggalira baddereeva 84 ababadde bavuga mmotoka nga banywedde omwenge.

Bino byabaddewo ku Lwokutaano mu bikwekweto ekyakoleddwa poliisi z’omu Kampala n’emirirwano mu kaweefube gw’eriko okukwata abamenya amateeka g’oku nguudo.

Baddereeva bonna abaakwatiddwa baasangiddwa banywedde omwenge, poliisi ky’egamba nti kiyinza okuvaako okukola obubenje.

Omwogezi w’ekitongole kya poliisi y’ebidduka, Michael Kananura yagambye nti ku Lwokutaano pollisi ez’enjawulo kuliko; ey’e Katwe nga yakutte abantu 18, Jinja Road yakutte 19, Kawempe eyakutte 12, Nansana 12, Old Kampala 14 ne CPS 9, ezaakoze ebikwekweto mwe zaayoledde baddereeva bano.

Yagambye nti baddereeva abamu tebaagala kugobera mateeka nga bwe babeera banywedde omwenge ate ne baagala okuvuga ebidduka byabwe ekintu ekitakkirizibwa era nga bonna abakwatiddwa bagguddwaako emisango gy’okuvuga nga bwanywedde omwenge.

Yategeezezza nti abagoba b’ebidduka balina okugoberera amateeka g’oku nguudo kuba mu tteeka eppya eryakoleddwaamu ennongoosereza erya 2024 okuvuga sipiidi okusukka kw’eyo erambikiddwa otanzibwa engassi esookerwako ya mitwalo 20 ate bw’olwawo okusasula zeekubisaamu.

Yagasseeko nti era mu tteeka eppya ddereeva takkirizibwa kuvuga ng’aleze omwana ali wansi w’emyaka 6 oba ng’amutadde mu maaso era nga nakino kikola ne ku mwana ali wakati w’emyaka 6 ne 12 nga nabo tebakkirizibwa kutuula mu maaso, balina kutuula mabega ate nga basibye omusipi.

Yagambye nti era omugoba wa pikipiki ne tukutuku balina okwambala ebikoofiira ( Helment) ne bazisiba kuba abamu bazituuza ku mitwe ne batazisiba n’agamba nti ssinga omuserikale akukwata akuvunaana, kubanga obeera omenye etteeka.