Okutambuza ekkubo ly'omusaalaba kukulembeddwamu abakulu okuva mu nzikiriza ez'enjawulo

NGA BWEKIBEERA buli mwaka, ku Lw’okutaano Olutukuvu, ne ku mulundi guno abagoberezi ba Kristu, abeegattira mu kibiina kya Uganda Joint Christian Council (UJCC) ekitaba enzikiriza z’abagoberezi ba Kristu essatu, okuli ey’Abakatoliki, Abakuristaayo, n’Abasodokisi, bakoledde wamu omukolo gw’okutambuza Ekkubo ly’Omusaalaba.

Okutambuza omusaalaba

Bano basimbudde mu bifo eby’enjawulo, okuli Lutikko y’e Lubaga (nga bakulembeddwaamu Ssabasumba Paulo Ssemogerere), Lutikko y’e Namirembe nga bakulembeddwamu Omulabirizi Moses Banja, Lutikko y’Abatuukirivu Bonna ey’e Nakasero (baakulembeddwamu Omulabirizi Omubeezi Jackson Fredrick Baalwa), ne Lutikko y’Omutuukirivu Nicholas ey’e Namungoona, nga bakulembeddwamu Ssabalabirizi Jeronymos Muzeeyi.

Abalala baavudde kumasinzizo nga Klezia ya Yezu Kabaka mu Kampala (baakulembeddwamu Msgr. Gerald Kalumba), Klezia y’e Nsambya (baakulembeddwamu Msgr. Charles Kasibante), Martyrs Church Nateete, n’awalala.

Bishop Bbanja ng'ali mu kutambuza ekkubo ly'omusaalaba

Bano bonna baakunganidde mu kisaawe ky’essomero lya Old-Kampala SSS, ngyebasomedde essaala ezawamu, ngabajjukira okubonaabona n’okufa kwa Yezu Kristu omununuzi w’ensi.

Ssentebe wa Uganda Joint Christian Council era nga ye Ssentebe w’Olukiiko lw’Abepiskoopi ba Uganda, era nga ye Mwepiskoopi w’e Kiyinda-Mityana, Dr. Joseph Antony Zziwa, eyabadde omuyigiriza omukulu, asabye Bannauganda bonna okukolerera emirembe. Ategeezezza nti Yezu bweyakomererwa ku Musaalaba, sso nga teyalina musango gwonna, yagendereramu kununula bantu mu kibi, n’okubalokola, bw’atyo n’asaba abakkiriza, okukyayira ddala ekibi, batabagane ne katonda, nebantu bannaabwe, era bakolerere emirembe Kristu gyeyaleeta era gyeyalangiriranga buli kiseera.

Ekkubo ly'omusaalaba

“Buli omu waali abeere omukutu oguleeta emirembe. Emirembe gino gyitandikire mumitima gyammwe. Eyo gyemusula, gyemukolera, bannammwe mubaleetere mirembe.”

Omwepiskoopi Zziwa yeewunyizza nnyo engeri omuntu gy’ayinza okukka ku mabujje n’agamiza omusu, ngayeeyambisa ebiso, era neyongera okwewunya abavubuka abakwakkuzi, abatayagala kukola, kyokka bwebawulira abakadde ngabatunze obumwanyi bwabwe, nebabayingirira ekiro, nebabatta, nebababbako ssente zaabwe.

Abakkiriza baasabidde abakyala Katonda abawonye ebizibu byebasanga, okuli okusosolebwa n’okutulugunyizibwa. Baawanjagidde ne Katonda awonye ensi entalo, ate n’okutaasa ensi kubayonoona obutonde bwayo.

Abaana nga beetabye mu kutambuza ekkubo ly'omusaalaba

Kkwaya eyawamu (Ecumenical Choir) yeeyakulembeddemu okuyimba ngeyambibwako bbandi ya Boysand Girls’ Brigade.

Okutambuza Kkubo lya Musaalaba kalombolombo Abagoberezi ba Kristu kebalola okujjukira okuboonyaabonyezebwa, n’okufa kwa Kristu, okwaviramu ensi okulokoka, era nga bino byonnabyaliwo ku Lwokutaano Olutukuvu.

Onukolo gw’omulundi guno gw’atambulidde kumulamwa ogugamba nti: “Muleke emirembe gya Kristu gyegyiba gyifuga mu mitima gyammwe