Mmande June 16, 2025Museveni awadde Mbale SS obukadde 30
PULEZIDENTI Yoweri Museveni asiimye omulimu abaddukanya essomero lya Mbale SS gwe baliko ogw’okutandika okuzimba ebbanguliro lya ssaayansi ne tekinologiya n’abakuba enkata ya bukadde 30 okubayambako mu nteekateeka.
Minisita Namboozo ng’akulembeddemu okutema evvuunike n’okusimba ejjinja ly’okuzimba ebbanguliro lya ssaayansi ne tekinologiya ku ssomero lya Mbale SS.
By Bukedde Omusunsuzi
Journalists @NewVision
PULEZIDENTI Yoweri Museveni asiimye omulimu abaddukanya essomero lya Mbale SS gwe baliko ogw’okutandika okuzimba ebbanguliro lya ssaayansi ne tekinologiya n’abakuba enkata ya bukadde 30 okubayambako mu nteekateeka.
Obubaka bwe, bwamusomeddwa minisita omubeezi ow’e Karamoja, Florence Namboozo ku mukolo ogw’okujaguza emyaka 75 bukya ssomero lino litandikibwawo mu 1949.
Akulira essomero lya Mbale SS, Moses Buyera yasiimye Pulezidenti okusoosowaza ssaayansi ne tekinologiya n’ebyemikono. Yategeezezza nti beetaaga obuwumbi 4 okuzimba ekizimbe kino kiggwe era ne yeebaza bonna abaayambye emirimu gyonna omuli n’okuteekateeka omukolo gw’okujaguza emyaka 75 bukya essomero lino litandika.
Omubaka omukyala owa Mbale City, Connie Nakayenze Galiwango wano we yasinzidde n’asaba Gavumenti eggyewo eky’okusuumuusa abasomesa ba ssaayansi ne baweebwa omusaala omungi okusinga ku basomesa b’amasomo ga ‘arts’ n’agamba nti n’abasomesa ba ssaayansi badda ku bannaabwe abalala ne babajerega. Yayongeddeko nti ke kaseera, abasomesa bonna bafune ensimbi kyenkanyi nga kino bwe kitaakolebwe, abasomesa abamu bandisuulawo emirimu.