Kitalo! ow'emyaka 11 afiiridde mu ttakisi ebadde etikkira mu ppaaka mu Kampala

Wabaddewo ekikangabwa, omwana omuwala ow'emyaka 11, bw'afiiridde mu ttakisi ebadde etikkira mu ppaaka mu Kampala.

Bino, bibadde mu ppaaka enkadde mu Kampala, omwana bw'afiiridde mu ttakisi nnamba UBM 696P ebadde etikka ku \makya okuva e Kampala okudda e Tororo.

Mu mugugu omwana gw'abadde nagwo, mubaddemu akapapula okuli ennamba y'essimu ne t-shirt eyakyenvu nga kuliko baaji y'essomero lya St. Anthony Parents Mukono, nga kuliko erinnya lya Kizza.

Kigambibwa nti omwana ono yaweereddwa ddereeva  wa Drone eno, Bosco Kalulu okuva eri gayidi  Asuman e Tororo, ng'ayagala amumutwalire e Walusubi.

Omwogezi wa poliisi mu Kampala, Recheal Kawala, agambye nti bwe baatuuse e Walusubi ng'essimu ze baabadde bamuwadde okukubako, teziriiko, kwe kusalawo omwana okugenda naye mu ppaaka e Kampala basobole enkeera okumuzza e Tororo, nti kwe kufiira mu ttakisi, mwe yasuze.

Agasseeko nti omulambo gutwaliddwa mu ggwanika e Mulago, ng’okubuuliriza bwe kugenda mu maaso.