Abazannyi ba Pool besunga kapyata ku Ssande

Abazannyi ba Pool engalo zitandise okubasiiwa okuvulumula motoka kapyata ezissiddwawo eri abanaawangula fayinolo ya Nile Special National Open Pool Championships ezigenda okubumbujjira mu Lugogo Indoor Arena ku Ssande.

Mmotoka zino zaayanjuliddwa mu lukiiko lwa bannamawulire e Lugogo ku kitebe kya National Council of Sports (NCS) ekimanyiddwa nga Lugogo Arena era nga we wagenda okubeera fayinolo zino.

Omukazi anaawangula awamu n’omusajja buli omu agenda kusitukira mu mmotoka Subaru Impreza olwo omusajja ayongereko ensimbi sh5,000,000/= ate omukazi afune sh3,000,000/=.

Baakwongerwako emmeeza okuzannyirwa Pool okwongera okukuguka mu muzannyo.

Abawanguzi abalala 16 mu basajja be bagenda okufuna ssente ate abakazi bakome mu munaana.

Emmotoka ezigenda okuwangulwa

Bino bibaddewo oluvannyuma lw’okukwata obululu okusengena enzannya ng’abazannyi bwe banaakwatagana ku Ssande.

Lugogo wakuyuuguuma ng’abazannyi abasajja 128 okuva mu bitundu by’eggwanga ebitali bimu be bagenda okuzannya fayinolo eno ate abakazi bali 32.

Ku bano, abasajja munaana bakafulu bbo tebayise mu kuvuganya okwokusunsula ate ng’abakazi bali bana.

Abasajja 120 n’abakazi 30 be bayise mu kusunsula okwatandikira mu lijoni mu October.

Omuzannyi wa kiraabu ya Upper Volta eyawangula mmotoka ya 2024 akomyewo kunoonya yakusatu wabula ng’ali mu kattu olw’okuba nti akalulu kamusudde ku Amos Ndyagumanawe eyawangula mmotoka eno mu 2015 era ng’anoonya yaakubiri.

Mu bakazi, Rukia Naiga eyagiwangula omwaka oguwedde aggulawo ne Angella Busingye.

Abazannyi abasoba mu 10,000 be bavuganyizza mu mpaka zino mu ggwanga lyonna nga okwetabamu wali osooka kugula ccupa za bbiya wa Nile Special musaanvu.