Kayanja atottoledde kkooti by'ayitamu n'abamujwetekako eby'ekikukujju

OMUSUMBA w'Ekkanisa ya Miracle Center Cathedral e Lubaga, Robert Kayanja atottoledde omulamuzi ebizibu by'azze ayitamu n'abamujwetekako ebikolwa by'ekikukujju n'amusaba nti bano ssinga gubakka mu vvi ng'abaasooka okumuwaayiriza baweebwe ekibonerezo ekisingayo obukakali.

Pr Kayanja Ng'atuuka Ne Mukyala We Jesca Kayanja

Yategeezezza nti ensonga lwaki abantu tebakomye ku kumusibako bintu bino lwa kkooti kwesuulirayo gwa naggamba kuba olumala okubasingisa emisango ate ebawa obubonerezo obutono okuli bulungiwansi n'agamba nti ssinga baawebwa ebinene baalikomye okumwogerako kalebule.

Ono, mu maaso g'omulamuzi Adams Byarugaba mu kkooti ya Nateete Lubaga e Mengo mw'abadde azze okuwa obujulizi mu musango gw'abavubuka abagambibwa okumwogerako nti yabakolako ebikolwa by'ekikukujju, yeeweze okufaafaagana n'abantu abamulebula n'agamba kati waakuleppuka nabo.

Olumaze okuwa obujulizi, omulamuzi Byarugaba amubuuzizza nti lwaki buli kiseera gwe basongamu olunwe ku bikolwa bino era wano Kayanja n'atandika okuwa ensibuko ya byonna okuva mu 2010 lwe yasooka okuleppuka mu kkooti wabula yasonze ne mu Basumba banne be yagambye nti bamusojja ku luwonzi ne yeebuuza egindererwa byabwe.

Kayanja yategeezezza kkooti nti mu 2010 Abasumba okwali Solomon Male n'abalala be baamuli emabega w'okumukonjera era yannyonyondde nti byatuukako ne mu maka g'obwapulezidenti okunoonyereza ne kuggwa nga talina musango kyokka era mbu mu 2013 omusumba Moses Ssempa n'akolagana n'abavubuka Ibrahim Nsubuga ne Moses Muwanguzi okumwogerako.

Abawaawabirwa Mu Kkooti.

Yagambye nti omusango we gwabasinga tekyabamalira ne bagenda okugulirira omusawo mu ddwaliro e Mulago eyabaggulako omusango naye era ne gubasinga kyokka kkooti n'ebawa kibonerezo kya bulungibwansi.

Wano we yasabidde nti singa bano gubasinga bakaligibwe ekimala kimala. Kayanja mu kkooti yazze ne mukyala we Jesca kw’ossa endiga z'ekkanisa ezaabadde mu bungi. Oludda oluwaabi olwakulembeddwa omuwaabi wa Gavumenti Jonathan Muwaganya lwabadde n'omujulizi ow'e 13 Kayanja ng'ono yabadde azze kwanukula bibuuzo byasigalira okuva lwe yawa obujulizi wiiki ewedde.

Omusumba Kayanja Mu Kaguli

Balooya b'abawaawabirwa nga bakulembeddwa Robert Ojambo yabuuzizza Kayanja by'amanyi ku nkolagana ya Agrey Kanene, Jamir Mwanda ne Israel Wasswa n'abawaawabirwa n'ategeeza nti bano baali basaale nnyo ng'abavubuka bakwatiddwa era agamba nti baafuna n'embavu okuvuga mmayiro 265 okugenda e Kiryandongo bano gye baakoleranga ekyewuunyisa.

Oludda oluwaabi lwakomye ku Kayanja okuleeta abajulizi baalwo ne lusaba abawaawabirwa basingisibwe omusango. Omulamuzi yabawadde okutuusa nga November 8, 2024 enjuyi zonna okuleeta enkubira yaazo.

Abawawaabirwa mwenda Moses Ssemanobe, Alex Wakamala, Martins Kagolo, Aggrey Kanene, Peter Sserugo, Reagan Ssentongo, Labeeb Kalifah, Israel Wasswa ne Jamir Mwada kigambibwa beekobaana ne balumba kkanisa ya Kayanja nga September 17, 2021 ne bamwogerako kalebule nti yabatusaako ebikolwa by’ekikukujju ne bakwatibwa kati gwe bawerennemba nagwo.