Amawulire
Gv't ewaddde District ye Wakiso akawumbi kamu okuddaabiriza amasomero
GAVUMENTI ewadde disitulikiti ya Wakiso akawumbi kamu okuddaabiriza ebizimbe mu masomero gaayo ssaako okuzimba ebipya n'ekigendererwa eky'okukendeeza omujjuzo mu masomero.
Agamu ku masomero aganda okkolebwako ate waggulu y'akulira eby'enjigiriza mu Wakiso Prim Ritah Nanyanzi ng'annyonnyola
By: Peter Ssaava, Journalists @New Vision
GAVUMENTI ewadde disitulikiti ya Wakiso akawumbi kamu okuddaabiriza ebizimbe mu masomero gaayo ssaako okuzimba ebipya n'ekigendererwa eky'okukendeeza omujjuzo mu masomero.
Akulira eby'enjigiriza e Wakiso, Prim Ritah Nanyanzi agambye nti ssente zino zigenda kuyamba okuzimba ebizimbe mu masomero agamu, okuzimba ennyumba z'abasomesa, okuzimba kabuyonjo ssaako n'okuddabriza ebikaddiye.
Nanyanzi yannyonnyodde nti ebitundu okuli Masuliita ne Namayumba bye byawereddwa enkizo kuba amasomero gabadde mumbeera mbi ate ng'omuwendo gw'abayizi munene oguliyo.
ssabadinkoni we Kazo era nga y'akulira eby'enjigiriza mubulabirizi bw'e Namirembe, Can David Mpagi ng'annyonnyola.
"Ku Masuliita S.S tugenda kuddabiriza ekizimbe kya bibiina 4 nga kyakumalawo obukadde 150, obukadde 180 bwakukozesebwa okuzimba ennyumba y'abasomesa ne Kabuyonjo ku ssomero lya Mmanze SS e Masuliita" Nanyanzi bweyayongeddeko.
Yayongeddeko nti ku ssomero lya Bbaale Wasswa bagenda kuzimbayo ekizimbe nga bataddeko obukadde 100, olwo ku Masuliita Junior bazimbeyo ekizimbe ne kabuyonjo ku bukadde 130.
Nanyanzi yagambye nti amasomero agaalondeddwayo gabadde n'okusomoozebwa kw'ebibiina ebitamala, ssaako abasomesa abakalubirizibwa okutambula engendo empanvu oluusi abamu nebaremesebwa okugenda okusomesa.
Kyokka Nanyanzi anynyonnyodde nti okusomoozebwa kw'abasomesa okuba abatono mu masomero kugenda kugonjolwa kuba disitulikiti kuntandikwa y'omwaka egenda kuwerezaayo abasomesa aba pulayimale ne sekendule.
Yagambye nti Wakiso erina amasomero ga pulayimale 167 ate aga siniya 20 nga mu kino betaaga abasomesa abasoba mu 200 okubuna mu masomero gano olwo ebyenjigiriza byongere okutumbuka.
Ab'ebyenjigiriza nabalala nga batongoza okuddabiriza ebizimbe. Baabadde ku ssomero lya Masuliita S.S
Yayongeddeko nti basiima ssente ezibawebwa kyokka nti bw'otunuulira amasomero agali mumbeera embi, akawumbi katono nnyo nga tekasobozesa kuzimba bizimbe biwera ate nga buli kizimbe kigendamu entebe abaana kwe batuula.
Ye ssabadinkoni we Kazo era nga y'akulira eby'enjigiriza mubulabirizi bw'e Namirembe, Can David Mpagi yasabye abawereddwa omuluimu gw'okuzimba obutakola gadibe ngalye olw'okuba bagala okwanguya omulimu kuba kireese ebizimbe bingi okugwa.
Yasabye disitulikiti efube okulondoola buli mulimu ogukolebwa ate n'okukakasa ntin gukoleddwa nga bwe gwalambikibwa mubiwandiiko eri bakontulakita kitaase ssente ya Gavumenti obutafirizibwa.
Yasomoozezza abazadde wadde Gavumenti n'ekkanisa babayambako, ate bbo baleme kwesulirayo gwa naggamba ku byetaago ebirara okuli ebitabo, yunifoomu, n'ebyokulya kuba bino nabyo bikola kyamaanyi kukusoma kw'omwana.
Abamu ku bazadde e Masuliita abaabadde munsisinkano.
Yasabye abazadde okufuba okwenyumiriza mu masomero ga Gavumenti ssaako okugagazisa abalala ate nabakutira okukomya okwekubagiza olw'olutalo olwayita mubitundu byabwe wabula bakole buli kyetagisa ku kusoma kw'abaana baabwe.
Abakulu b'amasomero nga bakulembeddwa Isaac Baguma, bebazizza nnyo Gavumenti olw'okuvaayo nelowooza ku masomero g'omubyalo era nebeyama okukola omulimu gwabwe ogw'okusomesa abayizi nabo babeere ab'omugaso mu ggwanga