Gen. Muntu asuubizza okusitula ebitundu bya West Nile mu nkulaakulana

GEN.Gregory Mugisha Muntu akwatidde ekibiina kya ANT bendera ayingidde olunaku olw'okusatu ng'asaggula akalulu, n’agumya abantu mu bitundu bya West Nile okubakulaakulanyiza ekitundu kyabwe ng'afuuse Pulezidenti w'eggwanga.

Muntu ng'ayogerako n'abatuuze b'omu West nile

Gen. muntu bw’abadde asaggula akakulu mu disitulikiti y'e Koboko, abantu mu bitundu bya West Nile balaze obutali bumativu olw'ekitundu kyabwe okusigalira emabega mu nkulaakulana nga bagamba nabo baagala okulaba ku nkyukakyuka.

Abantu ba West Nile, bategeezezza Gen.Mugisha Muntu nti wadde ebitundu by'eggwanga eby'enjawulo omuli; Lango, Acholi ne West Nile byakosebwa entalo nti kyokka bo basigalidde nnyo emabega nga bagamba nti basinga kuvuganya ku ngule y'ebitundu ebisingamu obwamu ne bamusaba nti bwe bamulonda ku bwapulezidenti nabo abajjukire.

Gen. Mugisha Muntu agumizza abantu b’omu West Nile nti bwe bamuwa obwapulezidenti ekitundu kyabwe waakukikulaakulanya nga yeeyambisa Obugagga Katonda bwe yabawa mu River Nile okulabanga atumbula eby'Obulambuzi mu West Nile nabo beenogere ku nsimbi.

Mu ngeri y'emu, Gen.Muntu asuubizza abantu b’omu West Nile nti gavumenti ye yaakuzimba Industrial Hub mu kitundu kino olw'ensonga nti ensalo okuli eya Uganda ne Democratic Republic of Congo n'eya South Sudan zibaliraanye, olwo amakolero gasobole okutunda ebintu bafune emirimo.

Gen. Muntu bw'amalirizza disitulikiti y'e Koboko agenze mu disitulikiti y'e Maracha nga eno olukung’aana alukubye mu Oleba Tawuni kanso abatuuze ne bamulaajanira ku bbula ly'abasawo n'Eddagala mu malwaliro ga gavumenti, amasomero, obwavu n'ebirala n'abakakasa nti bwe bamuwa akalulu byonna waakubikola.

Muntu asinzidde Maracha n'akunga Bannayuganda okweyambisa akalulu kano okulonda abakulembeze abanaasobola okubabanjiza obuweereza bwa gavumenti obulungi.

Ye eyaliko Omubaka wa Arua Kasiano Wadri akunze Bannayuganda okulonda Gen.Mugisha Muntu gw'agambye nti ye mukulembeze ow'amazima Uganda gwe yeetaaga mu kiseera kino