Bannakibiina kya NRM bakiise embuga n'obukadde 10 ziyambeko okutambuza emirmu gya Kabaka

BANNAKIBIINA kya NRM bakiise e Bulange-Mmengo okufuna emikisa eginabawanguza akalulu ka 2026 ssaako okutuusa oluwalo lwabwe lwa bukadde 10 okuyamba okutambuza emirimu gy’Obwakabaka.

Bano baaniriziddwa Katikkiro wa Buganda Charles Peter Mayiga ng’ono asabye bano nga bwebakyalina obuyinza obukulembera eggwanga, okukulemberamu kaweefube w’okumalawo ekibbattaka ekikyase ennyo mu Buganda.

Katikkiro Mayiga ng'ayogera eri Bannamawulire NRM

“Ensonga ezikwata ku ttaka n’obugulumbo bungi bwetuwulira oba obuliwo busaana okumalibwawo, mwe ababaka nga mwe mu kikulembedde mu naddala ng’abo abakiggyanya abantu ku ttaka lyaabwe nga bakangavulwa, bangi babeera bubeezi awo, teri abafaako, abamu bakwata n’emmundu,” Mayiga bwagambye.

Mayiga asabye Bannabyabufuzi nga banoonya akalulu, okwanja ebirowoozo ebinanogera okusomoozebwa okuli mu ggwanga amagezi okusinga okuwa ebisuubizo byagambye nti emirundi mingi, tebituukirira.

Katikkiro Mayiga awadde eky’okulabirako ky’omu ku beesimbyewo ku Bwapulezidenti asuubiza okuwa abavubuka abatalina mirimu 200,000/- buli mwezi n’agamba nti kino kizibu okutuukiriza wabula yandibadde alaga ekirowoozo ekinayamba okumalawo, ekizibu kino!

Minisita wa Microfinance Haruna Kasolo ng'ayogera

“Mu Buganda abantu bakosebwa nnyo bwebatafuna bujjanjabi. Twagenda e Buvuma awo ku ddwaliro Ssekabaka Daudi Chwa II lyeyabazimbira, abantu ne bajjula awo okujjanjabwa. Obwavu nabwo buluma nnyo abantu, abavubuka bangi emirimu tebalina. Ebbula ly’emirimu lisindika n’abavubuka bangi mu bumenyi bw’amateeka,” Mayiga bwabuulidde Banna NRM ebimu ku bizibu ebinyiga abantu ba Buganda.

Baminisita okuli Israel Kazibwe ow’amawulire, Noah Kiyimba avunanyizibwa ku Kabineeti, Olukiiko n’Abagenyi babaddewo ne Mayiga okwaniriza abagenyi b’embuga bano baabulidde nti Obwakabaka bwaniriza buli munnabyabufuzi singa abeera asa ekitiibwa mu Kabaka n’okutambulira awamu n’ensonga Ssemasonga etaano.

Banna NRM bano bakulembeddwamu Omumyuka wa Ssentebe wa NRM mu ggwanga atwala Buganda, Hajj Haruna Kasolo abuulidde Katikkiro nga bwebazze e Mmengo okufuna emikisa bagende banoonye akalulu bawangule, neyeeyama nti bagenda kukola kyonna ekisoboka okwegatta ku Bwakabaka okubanja gavumenti ebintu byabwo ebikyabanjibwa ate n’okusigala nga beetaba mu nteekateeka z’Obwakabaka zonna awatali kwebuzabuza.

Omukwanaganya w’ensonga za NRM mu Kampala n’emiriraano, Hajjat Faridah Nambi yeebazizza Kabaka olw’okuteekawo embeera esobozesa buli kibiina kya byabufuzi nga kifuna omwagaanya e Mmengo era neyeebaza Mayiga olw’okukiteekesa mu nkola.

Nambi awadde obweyamo nti bbo nga Banna NRM bagenda kufuba okwenyigira mu kaweefube w’okusitula embeera z’abantu n’ategeeza nga ye bwaali mu by’obujjanjabi by’abantu nga tekijja kumukaluubirira singa anabeera ayiseemu.

Katikkiro Mayiga ng'akwasa aba NRM mu Buganda Satifikeeti y'oluwalo lwa Bukadde 10

Ssentebe w’akabondo k’ababaka ba NRM mu Palamenti abava mu Buganda, Migadde Nduggwa abuulidde Katikkiro bwebali abawulize eri Obwakabaka era n’amutegeeza nga bwebaagala okuzzaawo omukwano gwa NRM n’abantu ba Buganda ogwakendeera mu 2021.

Omukolo gwetabiddwako Banna NRM abali mu bifo bya Palamenti ate naabo abeegwanyiza okuyingira Palamenti.

Bano kubaddeko Omubaka omukyala owa Disitulikiti  ye Mubende Hope Grania Nakazibwe, Cissy Namujju ow’e Lwengo, Minisita Hanifah Kawooya owa Mawogola West, Hajji Abdul Bisaso ayagala Kassanda South, Philip Munduni avuganya mu Makindye Ssabagabo, Eyaliko Minisita w’ebyobulimi mu ggwanga Vicent Ssempijja n’abalala.