Gen. amenye ekkomera mwe baasibira Bashir

GENERO alwanyisa Gavumenti ya Sudan amenye ekkomera mwe baasibira eyali Pulezidenti Omar al Bashir, n’aggyayo ‘ababaaya’ olutalo ne lusajjuka.
Abasibe abasinga abaatoloseddwa
beebo abaali mu magye ga Gen. Omar Hassan al-Bashir eyafugira eggwanga eryo emyaka 30 n’awambibwa amagye n’asibwa n’abamu ku b’amagye be abasinga
okubeera ab’akabi mu kulwana. Gavumenti ya munnamagye, Gen. Abdel Fattah al-Burhan eyawamba n’esiba Bashir, yalabye embeera yeeyongera okutabuka
ng’abamuyeekera emmundu gye bakuba eri ng’eyabawendule, yakitegedde luvannyuma nti be yagoba mu ntebe baatuuse dda mu ddwaaniro.
Olwo abayeekera ba Rapid Support Forces (RSF) abakulemberwa munnamagye, Gen. Mohamed Hamdan Dagalo, baabadde bamaze okumaliriza ddiiru y’okumenya ekkomera ggaggadde omwasibirwa abakuumi ba Gen. Bashir. Bakira buli mujaasi afuluma
nga y’akwasibwa emmundu lwasamayinja ng’asuulako ebyambalo by’amagye ng’alumba mu busungu obungi enfo z’amagye ga Gavumenti eyabasuuza omugaati.
Mu kasattiro ako, tewali amanyi Gen. Bashir gye yabulidde oba gye yeemululidde ng’ekkomera erimanyiddwa nga Kober prison gye yasibirwa ne banne liggyiddwaako ekijji eky’amaanyi. Gen. Dagalo anenya Gen. Fattah obutategeka kulonda kwa bonna nga bwe yasuubiza ng’awamba Bashir n’ensonga z’ebyenfuna endala ezirimu n’amawanga gakirimaanyi, Russia ne America agawagira olutalo olwo okulufunamu.
Okusinziira ku mawulire ga Middle East Eye, abasibe baatoloseddwa ku Ssande oluvannyuma lw’abayeekera ba RSF okulumba ekkomera ne bubeefuka n’abakuumi b’ekkomera kumpi bonna abaasigadde mu kkubiro. Okumanya abayeekera bazze beesomye bwe balina okuwangula olutalo lw’ekkomera, waabaddewo ekibinja ky’abalwanyi, nga waliwo n’ekyemmere n’amazzi saako ekyabadde kikutte engoye
z’ebyambalo by’amagye. Emmere n’amazzi byabadde byakuliibwa ababadde abasibekubanga bangi babadde bafa enjala okuva olutalo bwe lwatandise nga kizibu
kya kufuna kyakulya na kunywa.
Ensonda mu Sudan zigamba nti amagye ga Gavumenti gandiba nga gaategeddeko ku bulumbaganyi buno nga tebunnabaawo ne gagenda mu kkomera ne gategulayo Bashir aleme kuwambibwa bayeekera era nti ye kati ali mu mikono mituufu wadde ng’ekyo tekinnakakasibwa.
Gen. Bashir yaggulwako emisango gy’ekittabantu naddala mu bitundu by’e Darfur bwe yali akyali mu bukulembeze bwe yaggyamu mu 1989 nga ne kati yeetaagibwa kkooti y’ensi yonna. Abaamuggya mu ntebe baamusiba kyokka ne bagaana okumusindika
mu kkooti nga kino kitegeeza nti singa abayeekera baba bamulina, basobola okumuwaayo okwagala okufuna obuganzi mu Bazungu abaamuggulako emisango.
Si bayeekera bokka n’abali mu Gavumenti baagala be baba babeera naye kubanga nabo
basobola okubaza ekibalo ng’ekyabayeekera bwe bazuula we bafunira mu kumuwaayo mu kkooti y’ensi yonna nga bakikola