Eyasinze banne mu misomo gy'okwogerera ebitongole aweereddwa engule

EKIBIINA ekigatta aboogerera ebitongole mu ggwanga ekya Public Relations Association of Uganda (PRAU) kiwadde Bridget Kenyangye engule olw’okusinga banne mu misomo gy’amawulire naddala egy’okwogerera ebitongole egiyitibwa Public Relations (PR). Bino byabadde ku Uganda Martyrs University (UMU) e Nkozi mu disitulikiti y’e Mpigi.

Kenyangye yatikkirwa omwaka oguwedde mu November nga yafuna ddiguli mu by’amawulire era eby’okwogerera ebitongole yabifunamu A.  Kenyangye akola ku leediyo emu mu Kampala gy’asakira amawulire omuli n’agebyemizannyo.

Abamu ku bayizi abaasinze nga bali n'abasomesa baabwe

Bwe yabadde awaayo engule, Paul Mwirigi Muriungi amyuka pulezidenti wa PRAU yagambye nti bafaayo nnyo okulaba nga batumbula omutindo gw’omulimu guno era buli mwaka abayizi abasinze bannaabwe mu yunivasite ez’enjawulo babawa ebirabo era bababangula mu bintu ebyenjawulo. Kino bakikoledde emyaka munaana.

Omuwanguzi afuna engule, satifikeeti n’essente emitwalo 20 oba 30 nga kw’ogasse n’okubafunira we bakolera ‘internship’.

Omukolo gwetabiddwako abayizi, abakulira yunivaasite, abasomesa n’abakungu okuva mu PRAU. Era waliwo n’abayizi abalala abaasiimiddwa nga bano baawangula mu mpaka za  2024 Inter University Media Challenge competition.

Abayizi nga balaga ebirabo byebaafunye

Sister Dennis Samanya, okuva ku UMU agamba nti engule eno ewa abayizi amaanyi okukola ennyo n’omukisa okuteeka mu nkola bye basoma mu kibiina.

Ne Rev. Fr. Dr. Christopher Mukidi, amyuka akulira UMU agamba nti bateeka essira ku mpisa y’ensonga lwaki abayizi baabwe baanguyirwa okufuna emirimu kubanga si bangu baakugulirira naddala nga bali mu offiisi za gavumenti