Omutaka Nankere yeebazizza Ssaabasajja Kabaka olw'okukomyawo ekika ky'emmamba Kakoboza

OMUTAKA Nankere akulira ekika ya Mamba Kakoboza Moses Kanoonya Ntutumu yeebazizza nnyo ssabasajja Kabaka Ronald Muwenda Mutebi II olw’okukomyawo ekika kya mamba kakoboza, n'alabula abaagala okukisanyaawo nti tebajja kusobola.
Nankere yagambye nti wadde waliyo abeeyita nti bannansangwa, naye ate waliwo abo abamanyiddwa nti bebatuufu ennyo era n'asaba abazzukulu abakoboza obutaggwamu maanyi nga wadde waliwo ababasomooza.

Bino Nankere yabyogeredde ku mbuga y’ekika e Bukerekere- Kikandwa mu ggombolola ye Kakiri e Wakiso bwe baabadde baggalawo ttabamiruka w’ekika eyagendereddwamu okunyweza ekika ewamu n’okulaba bwekisobola okutambuza emirimu obulungi.
“Bangi ku bazzukulu baffe abawagamidde mubika ebirara nga tebamanyi buvo bwabwe, kyokka olw’ebyoto bye tukuma, bangi batandise okukomawo. Tubakubiriza mwongere okuzaala nga jjajja ffe kiwutta eyasooka bweyakola ekika ky’ongere okuggumira.” Nankere bweyayongeddeko.
Nankere era yalaze okusomoozebwa olw’abazzukulu abawala abesomye okutunda ebintu by’ekika eri abantu abalala ekiviriddeko ebintu ate okudda mubika ebirara olwo abazzukulu nebwebakaaba nebasigala nga bafiriziddwa.
Yategezezza nti ebintu bingi ebitundiddwa okuli n’ebiggya, era abazzukulu bwebafa olwo nebasooka kusaba babika birara abaagula okusobola okuzikawo ate oluusi ekiretawo entalo ezivaako nabamu okufuna obuvune.
Yebazizza nnyo ababaddewo ng’abakulu mukika batuuza ababaka mu masaza ag’enjawulo era nasaba bano abatuziddwa okufefetta abazzukulu yonna gyebali basobole okubakomyawo mukika bakyeyagaliremu.

Abatudde wansi ye mutaka Nakigoye ku kkono n'omutaka Nankere ku ddyo ssaako abazzukulu ba Mamba Kakoboza oluvannyuma lwa ttabamiruka.

Ye katikkiro asooka owa Nankere, Dr. Joseph Nkodyo Mukasa yategezezza nti ttabamiruka ono eyategekeddwa yagendereddwamu okusomesa abazzukulu ku mannya gebalina okutuuma abaana kitangire okukontana n’agebika ebirara.
Nkodyo yagambye nti abakerekere n’abazzukulu era baabasomesezza nekumakulu g’ebifundikwa eby’obuvunanyizibwa n’ebyensikirano ssaako n’okubisaamu ebitiibwa okulaba nga tebisobebwa.
Yayongeddeko nti baalaze nekumitndera gyebalina okuyitamu nga bakola ennyimbe n’emikolo gy’ebika ebirara kuba oluusi bangi babisobya era nabasaba okwebuuza singa wabaawo kye baba tebategeera bulungi.
Yagambye nti balina n’amannya ag’enkizo agatumibwa mubemituba, ab’amasiga newalala kitangire amannya agayinza okutumibwa mukika ate negaretera abazzukulu obuzibu nekika okutwaliza ewamu.

Omutaka Nankere ng'aliko byannyonnyola.

Omugenyi omukulu yabadde omutaka Nakigoye Samson Nabbimba Lukaabya omukulu w’ekika kye Kinyomo yasabye ab’ebika byonna okwongera amaanyi mubika byabwe nga babeera bumu, okuwagira emirimu gyabyo, ssaako okusomesa abazzukulu ebibikwatako.
Yasabye abazzukulu era okusonda nga ssente buli wewabaawo omulimu gw’ekika ogwetagibwa okuggusa, kiyambe ebika okuba eby’amaanyi ssaako okuwa ekifaananyi ekituufu eri obuganda.
Mu ttabamiruka ono, omutaka Nankere ne Nakigoye baasimbye omuti gw’ekijjukizo ku mbuga y’ekika, oluvannyuma omutaka Nankere nagabula bazzukulu be ekijjulo okubebaza okuba obumu n’okwekulakulanya