Ekkanisa ya Uganda ejjukidde eyali ssaabalabirizi wa Uganda omugenzi Mpalanyi Nkoyoyo

Ku Mmande nga January 5 lwegyaweze emyaka 8 bukya Ssaabalabizi Livingstone Mpalanyi Nkoyoyo afa. Ng’akabonero ak’okumujjukira, Ekkanisa ya Uganda y’ategeseewo okusaba okw’enjawulo, okwabadde kukijjukizo ky’Abajulizi ba Uganda eky’Abakuristaayo e Namugongo.  

Okusaba kwakulembeddwamu Ssaabalabirizi Stephen Samuel Kaziimba Mugalu. Kwetabiddwako  Abalabirizi abalala, okw’abadde Bishop Henry Katumba Tamale owa West Buganda eyawummula, Bishop Dunstan Bukenya ow’e Mukono eyawummula, Bishop  James William Ssebaggala pw’e Mukono eyawummula, Bishop Michael Lubowa owa Central Buganda, Bishop Enos Kitto ow;e Mukono, Bishop Omubeezi owa Kampala eyawummula, Dr. Hannington Mutebi, ne Bishop Jackson Matovu owa Central Buganda eyawummula, nga kati y’alabirira ekifo ky’e Namugongo.

Eya Katikkiro wa Uganda John Patrick Amama Mbabazi eyabadde omugenyi omukulu, ng'aganzika ekimuli ku malaalo ga Ssaabalabirizi Mpalanyi Nkoyoyo

Bweyabadde abuulira mu kusaba kuno, Omulabirizi Hannington Mutebi y’atendeerezza Ssabalabirizi Nkoyoyo olw’obukulembeze bwe obw’enjawulo, bweyagambye nti bw’ali bujjudde obwetowaze, obumalirivu, okwagala abantu n’okulumirwa abanaku, okwagala Obwakabaka bwa Buganda n’eggwanga Uganda. Y’amusimye n’olw’okwagala Enjiri ya Kristo erokola, era n’okujituusa kubalala, nabo nebasobola okulokoka.

Omulamuzi eyawummula, Canon James Ogoola y’atenderezza Ssabalabirizi Nkoyoyo olw’okuwoma omutwe mukuzimba Lutikko y’Abatukuvu bonna ey’e Nakasero, Church House, ate n’okurandikawo Yunivasite y’Abakuristaayo ey’e Mukono (UCU).

Y’asabye Abakuristaayo baleme kuyimba buyimbi matendo ge, wabula batwale mu maaso pulojekitize n’ebigendererwabye ebirungi.

Ssaabalabiriza w'Ekkanisa ya Uganda, Dr Stephen Samuel Kaziimba Mugalu (akutte omuggo)ng'ali n'abamu ku beetabye mu kusaba okw'okujjukira Ssaabalabirizi Livingstone Mpalanyi Nkoyoyo

Eyali Ssabaminista wa Uganda, Rt. Hon. Patrick Amama Mbabazi nga yeeyabadde omugenyi omukulu, y’asiimye Ssabalabirizi Nkoyoyo olw’okw’olesebwa okwekyewuunyo kweyafuna, okw’okukulaakulanya ekifo ky’Abajulizi eky’e Namugongo, n’asaba Abakuristaayo ne Bannauganda bonna okukikuuma, n’okwongera okukikulaakulanya.

Aba famire ngabakulembeddwamu Maama Ruth Nkoyoyo n’omutabani Isaac Nkoyoyo beebazizza Ekkanisa, gavumenti n’abantu abonna olw’okusigala ngabatambula ne famire ebbanga lino lyonna.

Jjajja w'Obusiraamu, Omulangira Dr Kassim Nakibinge(Wakati) n'abalala, nga bali mukusaba okw'okujjukira Ssaabalabirizi Nkoyoyo

Ssentebe w’Olukikiko olulabirira ekifo kino, Bishop Jackson Matovu yeebazizza gavumenti olw’okuwaayo obuwumbi bw’ensimbi za Uganda 21, obweyambisibwa okuzimba amphitheater, wabula n’asaba nendala, obuwumbi 14 n’ekitundu ezasigalayo, nazo bazibaweereze, basobole okumaliriza ebyasigalira, n’addala okuzimba  ekkanisa empya, n’okusasula abazimbi.

Ssabalabirizi Stephen Samuel Kaziimba Mugalu naye y’asabye gavumenti etuukirize ekisuubizo kyeyakola emyaka 4 egyiyise, eky’okugulira Maama Ruth Nkoyoyo (namwandu) emmotoka, era n’okugula emmotoka endala ey’ekitongole ekirabirira abaana bamuzibe Ssabalabirizi kyeyaleka atandiseewo.

Ssaabalabirizi Dr Stephen Samuel Kaziimba Mugalu (akutte akazindaalo) n'abalabirizi abalala nga bali mu kusaba

Y’asabye n’Abakuristaayo okuwagira ennyo buzinensi za famire zonna Ssabalabirizi zeyaleka, famire ereme kubulwa ssente zigyiyimirizawo. Y’asabye n’abavunanyizibwako, oluguudo olugenda ku kifo kya Rest Gardens Bweyogerere, lukubibwe kkolaasi.