Bya Edith Namayanja

EDDWAALIRO lya Bukedea Teaching Hospital, Sipiika Anita Among ly'azimbye litandise okujjanjaba abalwadde .

M ukulambula eddwaaliro ku Ssande, Among yagambye nti buli mukyala azaala nga teyeetaaga kulongoosebwa waakuzaalira bwereere era aweebwe ne 'Mama Kit' ey’obwereere nga abeetaaga okulongoosebwa baakusasulayo ku nsimbi entotono okuyambako  emirimu ku ddwaaliro okuddukanyizibwa obulungi.

Sipiika Among Ne Dayirekita Munne Moses Magogo Nga Balambula Eddwaaliro

Sipiika Among asabye abasawo okukola omulimu gwabwe n’obukugu era bajjanjabe abantu nga bwe batendekebwa, beewale ensonga zonna eziyinza okubeevumya mu bantu, bamwenyeze abalwadde era babajjanjabire mu budde.

Omu ku ba dayirekita b’eddwaaliro lino era nga ye mubaka wa Budiope East, Moses Magogo agambye nti yadde ng' eddwaaliro liri ku musingi gwa bwannanyini, balina okuteekawo enteekateeka ezimu ez’obwereere okuyambako omuntu wa wansi naye okuganyulwa mu nkulaakulana eno ereeteddwa mu kitundu.

Asabye abasawo okukozesa obukugu bwe balina okutaasa obulamu bw'abantu era ng'eddwaaliro lino lyakuggulwawo mu butongole omwezi guno nga gugwako ng' ebyuma mu bisenge omuli ; Emergency Unit, Laboratory, X-ray, theatre, maternity wards byonna bireeteddwa.

Eddwaliro lino era kuliko n’essomero eritendeka abasawo mu ndwadde ez’enjawulo.