Engeri akabenje gyekaatuze abayizi ba Buganda Royal nga bagenda okulya obulamu
Apr 15, 2024
Engeri akabenje gyekaatuze abayizi ba Buganda Royal nga bagenda okulya obulamu
Kabenje
Munamawulire
Munamawulire @Bukedde
EMBEERA ku ttendekero lya Buganda Royal Insitute of Business and Technical Education Mengo ya kiyongobero oluvannyuma lw’abayizi bana (4) okufiira mu kabenje bwe baabadde bagenda ku bbiici ku kabaga akaategekeddwa ettendekero lino.
Akabenje kano kaaguddewo ku Lwomukaaga ku ssaawa 9:00 ez’akawungezi ku kyalo Musinde ku lwe Garuga, mmotoka ekika kya Toyota Rumion UBH582S bwe yalemeredde omugoba waayo eyabadde agezaako okuyisa endala, n’ayingirira
Fuso ya soda eyabadden esimbye ku mabbali.
Mmotoka eno yabaddemu abayizi mukaaga era bana ku bano okuli; Ausi Ssempebwa abadde yaakatikkirwa mu by’emisono mu January w’omwaka guno (ye yabadde avuga), Hassan Ssentongo abadde asoma ebyamazzi, Joseph Mayanja ne Rogers Tukundane ababadde asoma ebyamasannyalaze baafiiriddewo ate bannaabwe okuli Kevin Taremwa ne Frank Ssekanjakko ne baddusibwa mu ddwaaliro e Kisubi nga bali bubi. Baabadde bagenda ku kabaga ku bbiici ya Katomi Kingdom Resort Garuga okwesanyusa nga baaniriza bannaabwe ab’omwaka ogusooka akamanyiddwa nga “Fresher’s Party’’.
Kabenje
Avunaanyizibwa ku by’ensoma mu ttendekero lino, Apollo Kaggwa yategeezezza nti baafunye ekyekango ekyamaanyi era n’asaasira abazadde abafiiriddwaako abaana baabwe mu njega eno.
Yagambye nti baakwataganye ne famiire z’abagenzi okukola ku by’okuziika ng’eggulo
ku Ssande abayizi babiri okuli; Hassan Ssentongo ne Ausi Ssempebwa baaziikiddwa. Ssentongo yaziikiddwa Mbarara ate Ssempebwa e Bujuuko ku lw’e Mityana.
Joseph Mayanja waakuziikibwa e Bukomansimbi ate Rogers Tukundane aziikibwe e Kyazanga leero (Mmande). Mu ngeri yeemu eddwaaliro lye Kisubi lyafulumizza ekiwandiiko ekiraga ng’abayizi ababiri okuli Kevin Taremwa ne Frank Ssekanjakko bwe bakubye ku matu era eddwaaliro lyakwataganye ne bazadde b’abayizi bano okulaba nga bafuna obujjanjabi obwetaagisa
No Comment