LOODI mmeeya Ssaalongo Erias Lukwago (ku ddyo) asitudde okugenda e Buyindi
okumulongoosa agamu ku magumba agagatta ku nkizi agawezezza emyezi ebiri nga gamuluma ssaako okumusannyalazaako oludda.
Obulumi bw’awulira bubadde tebumusobozesa kukola mirimu nga abadde takyasobola wadde okutuula mu ofiisi ate okutambula abadde yeewaliriza n’okwegumya
ennyo. Obulumi busimbuka mu mugongo ne bwambuka ku nsingo nga buli omubiri bwe
gwenyeenya ng’atambula awulira ng’afa. Ebiseera ebimu asannyalala n’omukono ogwa kkono n’okuwulira obulumi mu nsingo.
Mu bbaluwa eriko omukono gwa Dr. Henry G. Mwebesa ’eddwaaliro ekkulu e Mulago
gye yawandiikidde abasawo abagenda okumulongoosa mu kya Buyindi ekikulu ekya
New Delhi, yalaze nti olukiikolw’abasawo abakugu lwakakasizza okugendakwe.
Dr. Mwebesa yategeezezza nti olukiiko luno oluyitibwa Uganda Medical Board lwatudde ne lutunuulira ebiwandiiko ebikwata ku bulwadde
era ne lusemba agende ajjanjabibwe kubanga ali bubi.
Omwezi oguwedde yagenda mu ddwaaliro lya Nairobi Hospital e Kenya nga bamulagiridde abakugu abasobola okumuyamba ku kizibu kino kyokka bwe baamukebera ne bazuula nga ekizibu kinene wadde basobola okukikolako.
Baamubuulira nti ekisobola okumalawo obulumi kyokka kumulongoosa era baamutegeeza nti basobola okumulongoosa nga basinziira mu mugongo , oba mu
mbiriizi oba nga basimbuka ku nsingo waggulu okukka wansi.Baamuwa ekyanya   yeesalirewo ku nkola gy’ayagala oluvannyuma lw’okwebuuza.
Lukwago yawerekeddwaako mukyala we, Zawedde Lukwago nga baasitudde eggulo ku Lwokusatu.
Bakansala ku lukiiko lwe okuli JohnMary Ssebuwufu, Hakim Ssawula ne Olive Namazzi baamusiibudde mu makaage e Wakaliga.