Bbulooka w'ettaka bamutemyeko omukono ne gugwa wali ku by'okwagala mukaamusajja!

BBULOOKA w’ettaka e Nsangi agudde ku kyokya, omusajja bw’amulumbye n’amutemako omukono ne gugwa wali emisana ttuku oluvannyuma n’alinnya bodaboda n’abulawo. 

Ssaalongo Abbas Bantaliza akola bwabbulooka w’ettaka mu kkampuni ya Golola Property Consulatans e Nsangi, Kitemu, Nabbingo, Namagoma ne Kyengera, mu kiseera kino apooca na biwundu mu ddwaaliro e Mulago. 

Ettemu lino lyabadde ku kyalo Nsangi, Mukono Cell mu Kyengera Town Council mu Wakiso ku Ssande akawungeezi okumpi n’ekifo ekisanyukirwamu ekya Laplata Gardens.

Omwogezi wa poliisi mu Kampala n’emiriraano, Patrick Onyango yategeezezza nti ebyakazuulibwawo biraga nti omutemu yabadde agezaako kuwoolera ggwanga ng’alumiriza Bantaliza okumwagalira muganzi we gwe yasoose okutema. 

Eyabatemye yabadde atambulira ku bodaboda nga yeekapise ekikooti ekidugavu nga kigambibwa nti mwe yabadde atambuliza ejjambiya gye yeeyambisizza okutemaatema banne. 

Akola ogw’obukuumi ku Laplata Gardens, Bright Twesingoma yategeezezza nti eyatemye Bantaliza n’omuwala yabadde amaze akabanga ng’ajja mu kifo kino kyokka ng’atuula yekka ng’alabika aliko obukessi bw’abadde akola mu kifo ekyo ku babeerawo.

MUKA BBULOOKA AYOGEDDE
Muka Bantaliza, Shabirah Nakalyango yategeezezza nti ekifo awaabadde obulumbaganyi kyesudde mmita nga 50 okuva mu maka gaabwe.

Agamba nti bulijjo bba mmotoka ye agisuza ku Laplata era ne ku luno, yabadde
agenze kugipaakinga akomewo awaka.

Yantegeezezza nti mu kiseera we yatuukidde mu kifo kino ate n’ettemu ku muwala (ataategeerekese mannya) we lyabeereddewo