Bassentebe b’ebyalo abataalayidde bakukkuluma
OKULAYIRA kwa bassentebe kuzzeemu omukoosi abamu bwe bagaaniddwa ekirese abatuuze nga beebuuza ekiddako.
Town Clerk w’e Nakawa, Moses Ssempa ng’alayiza bassentebe. Mu katono ye, Kayemba gwe baasuulidde ekibaluwa.
OKULAYIRA kwa bassentebe kuzzeemu omukoosi abamu bwe bagaaniddwa ekirese abatuuze nga beebuuza ekiddako.
Mu Kampala Central, bassentebe ku byalo 25 tebaalayidde nga kyavudde ku buvuyo obwetobeka mu kulonda. Ku byalo 135 ebikola Kampala Central mu miruka 20, bassentebe 110 be baalayidde ate abalala Town Clerk Douglas Nsubuga abadde ne Mmeeya wa Kampala Central Salim Uhuru ne babagaana.
Abaalayidde baakwasiddwa ofiisi ne sitampu batandike okuweereza era baalabuddwa obutageza kwekiika mu mirimu gya KCCA.
Ebyalo gye baagaanyi bassentebe okulayira kuliko; Old Kampala Zooni I, Conte Africa e Kamwokya, Kasaato Zone mu Kisenyi, Nannozi, Lubaga Road B, Buganda Road Draper, Temple, Owino View, Radio Uganda, Shimon, Nkrumah Road, Christ the King, NEETA, Jambula, Kiyindi n’abalala.
Mu Kasangati Town Council, ku bassentebe b’ebyalo 50, ebikola Town Council eno, 33 be baalayiziddwa olwo ebyalo 17 ne bisigala nga tebalina bassentebe. Town Clerk w’e Kasangati, JB Muganga ne Meeya Baker Kazibwe baasabye okutuula n’avunaanyizibwa ku by’okulonda mu kitundu balabe ekyavaako emivuyo.
Abataalayidde ba byalo okuli; Nangabo, Buyinja, Luteete A, Nabuttaka-Gitta, Kiteetikka, Lusanja, Namalere, Bulamu Deputy, Kyetume A ne B, Kabubbu B, Manyangwa A ne B, Katta, Mayirikiti ne Lubatu.
Ku kyalo Bukungulu mu ggombolola y’e Kakiri mu Wakiso, abatuuze beeraliikirivu oluvannyuma lw’eyali Ssentebe waabwe Henry Kayemba okubasomera ekibaluwa kye baamusuulidde nga kimutiisatiisa ne ffamire ye.
E Nakawa, bassentebe 19 tebaalayidde ne basigala nga beemulugunya. Okulayira kwabadde ku kitebe kya Munisipaali e Nakawa e Naggulu nga kwakulembeddwaamu Town Clerk w’e Nakawa, Moses Ssempa era ng’obwedda balayira mu miruka mwe bava. Ssentebe wa zooni ya Mutola e Ntinda, Musa Lukyamuzi omu ku bataalayidde yagambye nti, yawangulira waggulu nnyo wabula tamanyi lwaki tebaamulayizza.
Omukolo gwetabiddwaako Loodi Mmeeya w’e Kampala, Ronald Balimwezo, RCC w’e Nakawa Edrine Benesa n’abalala. E Ntebe, bassentebe ba LCI e Lugonjo-Nakiwogo, Kakeeka Ward ne Katabi Ward abamu tebaalayidde.
Okulayira kwategekeddwa ku ofiisi z’ekibuga Ntebe. Abataalayidde kuliko; Paul Zikuliza owa Lugonjo -Nakiwogo, Jonny Oyira Kakeeka Ward nga bano bakyalina enkaayana. Abaalayidde baabakwasizza sitampu n’ebitabo ebirimu amateeka agabafuga ne babasaba okukola obulungi emirimu.