Basindise abakungu b'e Busoga 2 mu kkomera ku by'okubulankanya amafuta

Abakungu ba disitulikiti y'e Luuka mu Busoga, basindikiddwa ku limanda okutuusa nga January 8, 2026, ku misango gy'okubulankanya amafuta n'okutunda emirimu.

Ababiri bano, okuli Rajab Musisi akola nga yinginiya e Luuka, ne Daniel Ssengooba amyuka Engineering officer { Civil },be baasimbiddwa mu kkooti y'omulamuzi e Iganga ku misango gy'obulyake, okukozesa obubi ofiisi n'okubulankanya ebintu bya gavumenti.

Bano era,  kuliko Bernard Kayeyera, amyuka yinginiya nga bakyamunoonya, kigambibwa nti mu 2024 / 2025,  baabulankanya amafuta ga bukadde obusoba mu 222.

Kigambibwa nti amafuta gano, baalina okugeeyambisa  mu kukola enguudo okuli Busanda - Ikumbya rd, Busalamu - Waibuga rd, Ikumbya - Nantamali rd, Bukoova - Nawaka rd, ne Kyanvuma - Wandago rd.

Kyategeezeddwa nti era abasatu bano, baaduumuula emiwendo gy'amafuta nti oluvannyuma ne bagaguza abantu sekinnoomu, nga bakolagana ne bamaneja b'amasundiro g'amafuta.

Omwogezi wa poliisi mu Busoga North, Samson Lubega, agambye nti era George Muduuli omukulu w'essomero lya Tabingwa P/S naye yavunaaniddwa okufuna ssente ku bantu abaali baagala emirimu ku disitulikiti y'emu, wakati w'obukadde obusoba mu 5 ne 17. Ayongeddeko nti okunoonyereza, kugenda mu maaso.