Basabiddwa okutegeka emikolo n’okujjumbira okukuza wiiki y’ennimi ennansi mu Afirika
ABANTU bakubiriziddwa okwetegekera okukuza wiiki y’ennimi ennansi eneebeerawo okuva nga 24 – 30 January 2023, nga bategeka emikolo, emisomo, empaka, ebijjulo n’obubaga olw’okukuza ennimi zaabwe era bazikozese okulwanyisa enjala, okweggya mu bwavu n’okwekulaakulanya.
Basabiddwa okutegeka emikolo n’okujjumbira okukuza wiiki y’ennimi ennansi mu Afirika
By Musasi waffe
Journalists @New Vision
Akulira akakiiko akateesiteesi ak’ebikujjuko bya wiiki y’ennimi ennansi mu Afirika, Margaret Nankinga yategeezezza nti ku luno wiiki eno egenda kukuzibwa ku mulamwa ogugamba nti “African Languages for Sustainable Food Security, Cultural and Social-Economic Development for the Africa We Want” ekivvuunulwa nti Ennimi ennansi mu Afirika ku lw’enkola ez’olubeerera ezigobera ddala enjala, ebyobuwangwa n’okutumbula ebyenfuna n’embeera z’abantu mu Afirika eyeeyagaza”.
Wiiki y’ennimi ennansi yassibwawo akakiiko ka African Union ak’ennimi ennansi aka African Academy of Languages akakulemberwa Dr Dampha Fafa Lang e Bamako, Mali, n’ekigendererwa ky’okutumbula ennimi ennansi n’okuzikozesa okutumbula enkulaakulana n’embeera z’abantu mu Afirika.
Emu ku mmere ennansi eyayolesebwa gye buvuddeko.
Nankinga yategeezezza nti eng’ombo okugenda okutambula ebikujjuko egamba nti “ What we speak and What we Eat Makes Africa Great” ekivvuunulwa nti “Ennimi ze twogera ne bye tulya bifuula Afirika ey’emaanyi”
Yakubirizza abantu okuwandiisa emikolo gye bategese mu ACALAN, basobole okumanyibwa n’okuyambibwa.
Emikolo gikyayinza okuba nga giri ku nnimi ennansi n’endiisa y’abaana olw’okutumbula ebyenjigiriza, ku nnimi ennansi n’okukumba abantu okulwanyisa enjala nga balima emmere emala, oba ku nnimi ennansi n’okutumbula ebyenfuna okuyita mu mmere ennansi.
Basobola okutegeka ennyimba ezikunga abantu mu Afirika okulima emmere, emisomo ku nnimi n’ebyendiisa y’abaana, okutegeka empaka z’okusoma mu nnimi ennansi, okukunga abantu okulima emmere nga bayita mu mikutu gy’amawulire, okutegeka ebivvulu n’ebijjulo ku mulamwa ogwo n’ekigendererwa eky’okwagazisa abantu ennimi zaabwe ate n’okujjumbira okulima emmere emala.
Omu ku bakugu ba ACALAN ab’ennimi ennansi mu Afirika, Polof Marcel Diki Kidiri, munnakakiiko ka ACALAN ak’ekikugu akamanyiddwa nga “Assembly of Academicians” yasabye abantu mu Afirika okutegeka emikolo n’emisomo eginaatumbula okusoma ebitabo ebiwandiike mu nnimi ennansi era n’okubyagazisa abantu.
Kkampuni ya Vision Group etwala ne Bukedde ezze ekola kaweefube ow’enjawulo okutumbula ennimi ennansi n’okujjumbiza abantu okulima emmere ng’eyita mu mikutu gyayo gyonna omuli Bukedde olupapula Bukedde TV 1 ne Bukedde TV2 wamu ne Bukedde FAMA leediyo.
Erina emikutu gy’empuliziganya mu nnimi ennansi ez’ebitundu bya Uganda eby’enjawulo nga mu bukiikaddyo eriyo Radio Rupiny ne Wan Luo, mu buvanjuba eriyo Etop radio ne TV East ate mu bugwanjuba eriyo TV West ne Radio West.