Bammanerenda babawadde emyezi 6 okubanja amagoba gaabwe

Bya Edith Namayanja

MINISITA omubeezi ow’ebyensimbi Henry Musasizi ategeezezza nga gavumenti bw'eri mu kumaliriza okuteekateeka ebiragiro ebigenda okugobererwa abawozi b’ensimbi  (mmanerenda) nga bakola emirimu gyabwe.

Musasizi okwogera bino kiddiridde omubaka wa Agago North, John Amos Okot okwanja okwemulugunya ku nkola yaba mmanelenda gy'agambye nti emaze ku bantu naddala abakozi ba gavumenti emirembe ng' abamu ne kaadi zabawe eza ATM zaawambibwa.

Musasizi mu kwanukula ategeezezza nti pulezidenti bwe yabalagira okuteeka ekkomo ku magoba bammanerenda ge balina okusaba naye baakizuula nga kino kiyinza okugootanya enzirukanya y’emirimu.

Musasizi agamba nti kati ebimu ku bye batunuulidde kwe kussaawo ekkomo lya myezi 6 ku budde amagoba gano kwe galina okubanjizibwamu nga ssinga obudde buno buggwako mmanelenda waakufiirwa amagoba gano.

Ono ategezeezza nti bwe banaabeera bamaliririza ebiragiro ebigenda okulugamya omulimu gwa bamanerenda byakuleetebwa mu palamenti.