Abantu 3,000 baweereddwa ebyapa

Abatuuze abasoba mu 3,000 bakwasiddwa ebyapa mu nteekateeka eyatandikibwawo okuyamba okufunira abantu ebyapa.
Mu nkola eno, osasula ssente 80,000/- zokka mu kitongole  ekisolooza emisolo ekya
Uganda Revenue Authority (URA) ezisigadde Gavumenti n’ezikusasulira.
Enteekateeka eno eyitibwa Systematic Land Adjudication and Certification (SLAAC)
ejjumbiddwa mu bitundu eby’enjawulo.
Mu nkola eno, minisita w’Ebyettaka, Judith Nabakooba mwe yakwasirizza ebyapa abantu okuva mu kitundu kya Greater Mbarara. Yalabudde abaakwasiddwa ebyapa okwewala okubisinga mu bammanerenda kuba bwe banaakikola, bandibatwalako ettaka lyabwe.
Yagambye nti bammanerenda bakozesa abantu endagaanoy’okutunda ettaka sso nga  baba babawoze ssente ntono okukkakkana nga bafiiriddwa ettaka lyabwe.
Akulira Project eno, Wilson Mukaga yategeezezza nti disitulikiti eziganyuddwa mu
nteekateeka eno mulimu; Oyam, Ibanda, Kiruhura, Rwampara ne Mbarara. Yagasseeko nti nga bakolagana n’ebitongole bayambye abatuuze okwefunira obwannannyini
ku ttaka lyabwe.
RCC wa Mbarara, Catherine Kamwiine yasabye abantu okukwata ebyapa n’obwegendereza ate era beewale okubisinga mu bammanerenda.
Omubaka omukyala owa Mbarara, Margaret Rwebyambu yasiimye minisita okulwanyisa ekibbattaka mu ggwanga era n’amusaba okugenda mu maaso.
Omukolo gwetabiddwaako abakulembeze ba disitulikiti ezikola Greater Mbarara okuli;
Mbarara, Ibanda, Kiruhura, Isingiro, Rwampara ne Mbarara City. Abaaweereddwa ebyapa baasiimye Gavumenti okubayamba kuba babadde tebasobola kubyetuusaako.