Abatuuze bakkakkanye ku bavubuka abagambibwa okubba bbooda ne babookya ne bafiirawo

Abavubuka babiri abagambibwa okubba boda boda, babatemyetemye ne babakumako omuliro ne bafiira mu bulumi, wakati mu kulaajana. 

Bibadde ku kyalo Namunkesu LC 1 mu ggombolola y'e Namungalwe mu distulikiti y'e Iganga, bwe basse abavubuka babiri nga babateebereza okubba pikipiki nnamba UGC 169 V. 

Kigambibwa nti pikipiki eno omubadde obuuma obulondoola, bagibbye okuva e Mayuge era ne bagezaako okugiggyamu akuuma akalondoola kyokka ne musigalamu akalala.

Omwogezi wa poliisi mu Busoga East, Micheal Kasadha, agambye nti aba bodaboda, babalondodde nga badda e Iganga ne babakwatira ku luguudo oluva e Nakalama okudda e Namungalwe nti mu kubagoba, baddukidde mu bikajjo. 

Ababbooda nga bali n'abatuuze, babayizze ne babakwata ne babatemaatema ne babookya nga bakyali balamu. 

Agasseeko nti, emirambo poliisi egitutte mu ggwanika ly'eddwaaliro e Iganga, ng'okubuuliriza bwe kukolebwa