Abasawo abasoba 200 basindikiddwa mu byalo e Luweero okulwanyisa endwadde
GAVUMENTI etendese abasawo abawera 202 n'ebasindika mu miruka egy'enjawulo mu disitulikiti ya Luweero batambule nju kunju okuyambako okulwanyisa endwadde n'okusomesa abantu eby'obulamu.
Diana Twine ng'ayogerako eri Abasawo abasindikiddwa mu byalo
By Kanyike Samuel
Journalists @New Vision
GAVUMENTI etendese abasawo abawera 202 n'ebasindika mu miruka egy'enjawulo mu disitulikiti ya Luweero batambule nju kunju okuyambako okulwanyisa endwadde n'okusomesa abantu eby'obulamu.
Omuwandiisi w'enkalakkalira mu minisitule y'ebyobulamu Dr Diana Atwine yasinzidde ku kitebe kya disitulikiti e Luweero mu kufulumya ba Community Health Extension Workers abamaze ennaku 180 nga batendekebwa mu by'obulamu n'abasaba okwewala okweyita ba dokita ne batuuka okwetantala okujjanjaba endwadde ze batasobola.
Buli muluka mu Luweero guweereddwa abasawo babiri omwami n'omukyala abagenda okusomesa eby'obulamu n'okulwanyisa endwadde nga baakwasiddwa obugaali maanyi ga kifuba, "tabs" okuyingizaamu amaka agatalina kaabuyonjo, agatagemesa baana, magetisi, ensawo, obuuma obukebera puleesa, sukaali, kansa wa nnabaana n'endwadde endala ezibakwata ne baliyita eddogo ekibaviirako okusaasanyiza ensimbi mu basamize.
Abasawo abaasindikiddwa mu byalo
"Mbeegayiridde temutuuka eyo ne mweyita ba dokita wabula tubatumye kugenda mu maka musomese abantu okuziyiza endwadde , okubakubiriza okugenda mu malwaliro, okugema abaana, okubasomesa endya ennungi n'ebirala tusobole okuziyiza omujjuzo mu malwaliro oguva ku ndwadde ezeewalika n'abantu baffe babeere balamu basobole okukola bafune ensimbi", Dr Atwine bwe yagambye.
Yabasabye okwewala okukoonagana n'abasawo b'ebyalo ba VHT be bagenda okusangayo wabula bakolere wamu nabo okutumbula eby'obulamu.
Ssentebe wa disitulikiti ya Luweero Etasto Kibirango yasabye gavumenti eyanguyeeko okumaliriza eddwaliro lya Kasana, okuliwa ekyuma ekikuba abalwadde ebifaananyi, Xray) n'ebirala n'amalwaliro mu magombolola okugongeramu ebikozesebwa.
Abakungu okuva mu miisitule y'ebyobulamu, omubaka wa Bamunaanika mu palamenti Robert Sekitooleko n'abalala beetabye ku mukolo guno.