Abalotale bagabidde abaana ku kyalo ebitabo by’okusoma

Bya Henry Nsubuga

Mu kaweefube wa bannalotale mu Uganda omwaka guno okuteeka essira ku kusoma n’okuwandiika mu baana abato, bammemba ba Rotary Club of Namiryango - Mukono badduukiridde ekyalo ky’e Kirowooza n’ebitabo by’abaana eby’okusoma ebibalirirwamu obukadde bw’ensimbi.

Ebitabo bino byakwasiddwa essomero lya Kirowooza SDA P/S ku lw’ekyalo ky’e Kirowooza nga Pulezidenti wa lotale eno, Angella Bizimana ye yabikwasizza abakulembeze b’ekyalo ku Lwokusatu.

Angella Bizimana Pulezidenti Wa Lotale Ng'akwasa Ab'akakiiko K'ekyalo E Kirowooza Ebitabo.

Bizimana yagambye nti baabadde bakuza olunaku olumanyiddwa nga ‘DEAR day’ ekivvuunulwa nti “Drop Everything and Read”.

Yatageezezza nti okusinziira ku kunoonyereza kwabwe, baakizuula nti ekitundu kino kirimu abaana bangi ate ng’embeera abazadde gye balimu tebasobozesa kugulira baana baabwe bitabo kusoma.

Omusomesa Ng'alambika Abaana Nga Basoma Ebitabo Ebyabaweereddwa Lotale Y'e Kirowooza.

Bizimana yasabye abakulembeze b’ekyalo okubawa ettaka bazimbeko etterekero ly’ebitabo, olwo kibeere kyangu eri abaana ku mitendera gyonna okuva ku batandika okusoma okutuuka ku bali ku yunivasite okugendangayo nga basoma ebitabo nti kuba  olw’embeera y’eby’ensimbi, abazadde bangi tebasobola kugulira baana baabwe bitabo ku mutendera gwa ssekinnoomu.

Abaana baasoose kubasomesa kusoma mu bibinja eby’enjawulo oluvannyuma ne bagenda nga baggyamu omu kw’omu ng’asoma ng’abamu baasobodde okusoma obulungi ate abalala ne bagezaako bugeza.

Omu Ku Baana Ng'asoma Ekitabo.

Eric Nelson Hawumba, akulira enteekateeka za ‘Basic Education and Literacy Enhancement Program’ (BELEP) yagambye nti gavana wa Rotary Club mu Uganda, Mike Kennedy Ssebalu yasalawo omulamwa gw’omwaka guno olwa lotale guteekebwe ku kusoma.

Henry Luzinda, omwana enzaalwa ey’e Kirowooza yagambye nti enteekateeka eno egenda kuyamba nnyo okusitula omutindo gw’abaana mu kitundu n’okubayamba okukozesa obulungi obudde bwabwe bwe banaasobolanga okufissangayo akadde ne bagenda basoma ku bitabo.

Luzinda yakalaatidde omukulu w’essomero lya Kirowooza SDA, William Isiko okukkiriza abaana abatali ba ssomero lye okugendangayo basome ebitabo ng’ekigendererwa bwe kirambikiddwa.

Isiko yasiimye aba lotale n’agamba nti babadde n’ekizibu kya maanyi olw'ebbula ly'ebitabo .