Aba Lotale y’e Bwebajja bajunye ab’essomero lya St. Charles Lwanga

ABA Rotary Club y’e Bwebajja bajunye abayizi b’essomero lya St. Charles Lwanga P/S Kawuku n’ebikozesebwa mu kusoma okuli ebitabo ebisomesezebwamu, peeni, emikebe gya seeti, ekkalaamu, ebitabo by’okuwandiikamu n’ebirala.

Bano bakwataganidde wamu ne Euro foam, Victory travel center nga kino bakikoze bwe babadde bakung'aanidde ku ssomero lino okujaguza olunaku lw’okusoma ekiyitibwa D.E.A.R day (Drop Everything And Read) nga kino kikolebwa olw’ekigendererwa ky’okusiga omutima gw’okusoma bwino mu bantu.

PDC Urs Herzog yabadde omugenyi omukulu, ono yawabudde abayizi okwettanira okusoma ebiwandiikibwa eby’enjawulo ng’empapula z’amawulire, ebitabo n’ebirala kubanga buli lwe basoma bazuula bingi ebikusike era ne bafuna okumanyisibwa olwo ensi n'ebanguyira.

Pulezidenti wa lotale eno, Annie Ninyesiga ategeezezza nti kyamakulu nnyo omuntu okwemanyiiza okusoma olw’ensonga buli yeewaayo okusoma aba yettanidde butereevu okuyiga ky'abadde tamanyi.

Akulira essomero lya St. Charles, Elizabeth Tusaba annyonnyodde abalotele ebizibu ng’essomero bye bayitamu kubanga bali ku musingi gwa gavumenti ng’ebibanyiga kuliko obutaba na ntebe abayizi kwe batuula ezimala, n’ekifo ew’okutereka ebitabo n’ebirala.

Wabula ono yasiimye lotale eno kubanga guno si gwe mulundi ogwasoose ng’ebaduukirira, olulala yabawa ttanka z’amazzi wamu n’okubasimbira emiti ku ssomero lino.

Abalotale Nga Bakwasa Omukulu W'essomero Elizabth Nagawa (ow'okubiri Ku Kono) Empapula Ezikozesebwa, Okuva Ku Dyo Ye Pdc Urs Herzog, Pulezidenti Ann Ninyesiga N'abalala