'Mwewale okuboola abaana abaliko obulemu kuba nabo bantu'

Bannayuganda naddala abazadde basabiddwa okutwala abaana abaliko obulemu nga abantu baabulijjo, n'okwewala okubaboola.

Bino byayogeddwa Sister Imaculate Amoite akulira amaka ga bakateeyamba aga St. Lillian Jubilee Home agasangibwa ku Klezia ya Our lady of Good Counsel  e Gayaza bwe yabadde awayaamu ne bannalotale abaamukyaliddeko wamu n’okudduukirira abaana bano ku lunaku lw'Ameefuga ga Uganda.

Sr. Amoite yagambye nti abaana abamu babasanga ku ggeeti ku makya nga abantu baabasudde awo ate abalala batuuze be babagulizaako nga bazadde baabwe babaggalidde mu buyumba bw'embwa awaka olw'ekikula kyabwe.

Bannalotale abaabadde bakulembeddwa Francis Xavier Sentamu, eyali District governor 9211 baategeezezza nti baasazeewo okudduukirira abaana bano abakuumibwa mu kifo nga bakikola wansi w'omulwa gwa Rotary gwe baatuuma "bulimu bamuzzeemu essuubi abeere bulungi'.

Bannalotale bano baatonedde abaana bano ebintu ebikozesebwa mu bulamu obwa bulijjo okuli, ssabbuuni, obuwunga , sukaali, pampa, omuceere, butto, wamu n'ebirala.

Sister Amoite yasiimye obuyambi era n'ategeeza nti obuzibu bw'asinga okubeera nabwo bwa pampa kubanga abaana bano boonoona awo we bali.

Omu ku bannalotale ng'aliisa omwana

Amoite yategeezezza nti waliwo omuntu ow’omutima omulungi eyagulidde amaka ga Bakateeyam ba ettaka we bagenda okusengukira oluvannyuma lw'abantu okwogera okusuula abaana ku ggeeti yaabwe buli kiseera era wano bannalotale baasuubizza okumudduukirira mu kuzimba ekifo ekipya e Busiika gye bafunnye ettaka.

Bannalotale bano baavudde mu club za Rotary omuli; Gayaza, Mukono Central, Bulindo, Kampala Maisha, Mahaba, Kira, Kiwatule wamu ne Bulindo era bano bonna baawadde obubaka.

Ye Fr Fredrick Ddungu eyakulembeddemu mmisa yeebazizza aba Lotale olw'omutima omuyambi ogw'okwagalwa bakateeyamba.

"Mwebale kutwagala, mwebale butatuboola. Abalotale zonna omuli; Gayaza, Kampala Maisha, Kira, Bulindo, Kiwatule, Mukono Central mwebale kujaganya meefuga n'abaana baffe abaliko obulemu," Fr Ddungu bwe yabasiimye.

Ye Dr. Dorothy Kyeyune, pulezidenti wa bapulezidenti bonna mu disitulikiti 9213 yeebazizza bannalotale banne olw'okusuulira abaana abaliko obulemu omwoyo n'akubiriza abazadde abazaala abaana abataliiko mwasirizi obutababoola.

"Abazadde abazaala abaana abaliko obulemu mukomye okubaboola wabula mubayise bulungi ng'abaana abalala. Bw'olaba ng'omwana aliko obulemu akulemeredde , tomusibira mu kayumba ka mbwa, tomusuula wabula muleete mu maka ga bakateeyamba bamulabirire," Dr Dorothy bwe yayongeddeko.

Yinginiya Dan Kiguli Kibuuka, pulezidenti wa Gayaza Rotary eya eyategese omukolo guno yeebazizza bannalotale bonna olw'omutima omuyambi gwe baayolesezza n'asaba abantu bonna okukwatirako lotale nga batuusa obuyambi ku bantu.