Abalenzi baleebezza abawala mu mazina g’ekinnansi agaategekeddwa ku Nkozi Yunivasite

OKUVA edda mu Buganda ng’amazina g’ekinnansi nga nnankasa, muwogola ne bbaakisimba gasinga kuzinibwa baana abawala n’abakazi. Kyokka ensangi zino abasajja n’abaana abalenzi bageetanidde nnyo era abamu gaabafuukira omulimu mwe baggya ensimbi.

Abayizi nga battunka mu mazina

Ku Yunivasite ye Uganda Martyrs e Nkozi, abalenzi baasindanye n’abawala mu kutyetyebula amazina g’ekinnansi omwabadde okuvuganya mu mpaka z’obuwangwa n’ennono ezaatuumiddwa Heritage Education Program Competition’ nga zaategekeddwa ekitongole kya Cross Cultural Foundation of Uganda (CCFU).

Amasomero ataano ge geetabyemu nga kwabaddeko; St. Mugagga SSS Jalamba, St. Benedicts SSS, St. Marys SSS Nkozi, St. Balikuddembe SSS Mitala Maria ne St. Henry’s SSS Kyagalanyi.

Abayizi nga battunka mu mazina g'ekinnansi

Abalenzi abaasusse mu 10 obwedda banyeenya ebiwato ng’ogamba temuli magumba. Bwe baatuuse ku muwogola ne bbaakisimba ne gubula asala. Bakira banyeenya n’okukankanya ebiwato nga bwe basimba ebigere olwo enduulu n’esaanikira ekitundu.
Era ku mukolo gwe gumu abayizi baayimbye ennyimba z’ekinnansi n’okuzannya emizannyo egy’edda ng’okubuuka omuguwa, okuzannya omweso n’ekigwo ggumbya. 
Gye byaggweeredde nga St. Mugagga be bawangudde ne bakwasibwa engule yaabwe mu  n’essente emitwalo 50.

St. Marys Nkozi ye yaddiridde n’efuna emitwalo 30 ate yo St. Balikuddembe SSS baabadde mu kyakusatu nga baafunye emitwalo 20. St. Henrys Kyagalanyi yabadde yaakuna nga yaddiriddwa St. Benedicts SSS. Bano, buli ssomero lyafunye emitwalo 10.