Abaasimattuse akabenje akasse ab'e Kitebi balojja

ABAASIMATTUSE akabenje akaagudde ku kyalo Kamuli mu ggombolola y’e Lwentulege mu Rakai omwafiiridde aboomuliraano omukaaga nga babadde batuuze e Kitebi banyumya entiisa gye baayiseemu.
Abamu ku baasimattuse baggyiddwa mu ddwaaliro e Rakai gye baddusiddwa okufuna obujjabi obusookerwako ne bakomezebwawo mu maka gaabwe e Kitebi.
Abamu baatwaliddwa mu malwaliro ag’enjawulo okwongera okufuna obujjanjabi.
OBUZIBU BABUTADDE KU LUGUUDO OLUBI
Kkansala w’ekitundu akabenje we kaagudde Evas Kansiime yagambye nti obuzibu bwavudde ku mbeera y’oluguudo embi nga lujjudde ebinnya.
Abatuuze baagasseeko nti n’emmotoka yabadde edduka nnyo ng’ate n’oluguudo lubi era
baalabye eva ku luguudo ne yeerindiggula ekigwo ne yeefuula emirundi egiwera.
Oluguudo luno luliko obuwanvu bwa kiromita 42 nga luyitibwa Rakai-Kibaale-Kibanda-Isingiro.
Ssentebe wa disitulikiti y’e Rakai, Ssaalongo Samuel Kaggwa yagambye nti bamaze emyaka 35 nga balaajanira gavumenti n’ekitongole kya UNRA okulukola naye nga kikyalemye. Yagambye nti oluguudo luno lwa nkizo nnyo
eri disitulikiti y’e Rakai kubanga lwe lugigatta ku disitulikiti endala okuli; Mbarara ne Isingiro era ebyamaguzi bingi ebiyisibwako.
Avunaanyizibwa ku kulabirira enguudo mu disitulikiti eno, Umar Ssebalinde yagambye nti baakwongera okussa akazito ku gavumenti okulaba ng’erukola.
Omwogezi wa poliisi mu Greater Masaka, Twaha Kasirye yagambye nti bakyanoonyereza ku kyavuddeko akabenje, wabula nga basuubira kyavudde ku kuvuga ndiima.
BAKAAWONAWO BALOJJA
Agnes Niwagaba Ssali amanyiddwa nga maama Molly gwe twasanze nga bamutwala mu ddwaaliro e Kiruddu yategeezezza nti; Twagenda ne baddereeva babiri, omu yatuvuga nga tugenda ate omulala Muhamood Mutumba n’atuvuga nga tukomawo.
Mu kudda, Mutumba yasalawo ayite mu kkubo ly’e Rakai nga bamugambye nti kumpi okusinga okuyita mu lw’e Masaka- Mbarara. Nnali ntudde ku
mutto ogwokubiri emabega wa kondakita.
Bwe twasanga ekkoona, ddereeva n’asala ku sipiidi aliyiteko kumbe gye liggweera
ate waaliyo ekikko eky’amaanyi, ate ng’ekkubo lya ttaka lirimu oluyinja, awo emmotoka we yatandikira okucankalana ne sipiidi ne yeeyongera. Ddereeva yalwanye okugisiba n’egaana olwo buli omu n’atandika okusaba essaala. Yeefudde emirundi nga etaano okutuuka akaserengeto ak’amaanyi gye kaabadde kaakoma, ne yeekoona ku kiyinja ekinene kwe yasibidde.
Endabirwamu zaayiise abamu ne bayitamu era nze nayise mu kituli ekyabadde okumpi ne nfuluma nga nzenna ntiriika musaayi olw’ekiwundu kye nafunye ku mutwe. Nagenze okulaba ku bbali nga bannange bangi bafudde.
Ye Abdurahman Bukenya, asangiddwa mu ddwaaliro lya Careton Medical Center e
Kitebi yagambye nti; oluyinja mu lugundo, lwe lwawaludde emmotoka era ddereeva yalabye bigaanyi n’akabatema nti; “Bannange munywere emmotoka entabuseeko,” olwo n’etandika okwerindiggula ebigwo.
Yagasseeko nti Mutumba eyabadde avuga yakutuseeko omukono era ali Mulago.
Justine Namugenyi ‘Maama Ruth’ yategeezezza nti baasooka kulabula ddereeva obutabayisa Rakai kuba oluguudo lubi wabula n’alemerako. Yagasseeko nti obutayaayaana kufuluma kyandiba nga kye kyabayambe kubabonna abaalwanye  okufuluma baafudde.
BABASABIDDE
Omu ku baafudde Dan Kibirige y’abadde omuwandiisi ow’ekyama ow’omutaka Kasujja
akulira ekika ky’Engeye.
Waategekeddwaawo okusaba mu kkanisa ya St. Luke e Mutundwe nga kwakulembeddwaamu Ssaabadinkoni w’e Nateete, BK Buwembo, eyamutendereza
okwagala eddiini ye ey’Obukristaayo. Waakuziikibwa leero e Mpambire mu disitulikiti
y’e Mpigi.
Ate ye omumbejja Veronica Nakabiri ne Teddy Ishungisa nabo baabasabidde ku kisomesa kya Amansi ne Mapeera e Kitebi. Nakabiri waakuziika e Nabusanke ku lw’e Masaka 

OBUBENJE OBUtuze ABAVA OKUZIIKA 

l January 8, 2021, abantu 5 aba ffamire emu, baafiira mu kabenje e Jaluko, mu ggombolola y’e Magada, ku luva e Namutumba okudda e Mbale. Baali bagenda Budaka kuziika. Abaafa kwaliko; Mariam Musenero, Madina Sabano, Nasim Musenero, Sula Kungu ne Khalifa Waira.  Nga July 16,2023, abantu 16 nga bonna abatuuze mu Kagadi Town Council mu disitulikiti y’e Kagadi, baafiira mu kabenje nga bava okuziika
e Fort Portal.
l September 17, 2022, abasumba basatu ab’ekkanisa ya Elim Pentecostal Church mu Jinja, baafiira mu kabenje nga bava okuziika e Mayuge. Abasumba bano kwaliko; Henry Maisonswa, Rose Leku n’omulala eyategeerekekako rya Mande. l Nga January 11, 2019, abantu 2 nga batuuze mu muluka gwa Obim mu disitulikiti y’e Alebtong baafa nga
bava okuziika owooluganda, loole kwe baali, bwe yayabika omupiira n’eremerera omugoba waayo. William Okello ne muganda we Joel Abura