Aba NUP mu Busoga bawandiikidde Bobi Wine ku nsonga ezitawaanya ekitundu

 Bya Willy Ssemanda

BANNAKIBIINA kya National Unity Platform (NUP), mu bitundu bya Busoga bawandiikidde pulezi­denti w’ekibiina Robert Kyagu­lanyi Ssentamu (Bobi Wine) nga beemulugunya ku bye bagamba nti tebigenda bulungi ne basaba abitereeze.

Mu kiwandiiko ekyateeked­dwaako omukono omukwanaganya w’emirimu gya NUP mu Busoga, Baamu Lulenzi (Meeya wa Iganga Munisipaali), ku lwa banne abad­dukanya emirimu gya NUP mu disi­tulikiti z’e Busoga bannyonnyodde ensonga eziraga nti obukulembeze bw’ekibiina obw’oku ntikko ab’e Busoga bubaleka bbali nga bingi bikolebwa. Baanenyezza ekitebe n’obukulembeze bw’oku ntikko okusalawo ku by’e Busoga nga tebabeebuuzizzaako. Bagamba nti olw’obutabeebuuzaako, okusalawo kukolebwa nga tewakoleddwa kunoonyereza kumala ne bawa ekyokulabirako ky’okugoba Moses Bigirwa, nti kyakosa entambuza y’emirimu ate ng’ebyamugobya tebyaliko bujulizi bumala.

Baategeezezza nti beewuu­nya okulaba nga mu kabineeti ey’ekisiikirize eyalondeddwa mu December tewaaliwo mukulembeze w’e Busoga n’omu yalondeddwa. Ne bagamba nti olw’enkola eno erabika ng’ey’obusosoze, ab’e Busoga balaba nga baalekeddwa ebbali.

Mu birala bye baanenyezza mulimu okwerumaaluma mu bakulembeze ba NUP mu Busoga n’okuwaayirizanga bannaabwe awatali abakuba ku mukono.