Omukozi w’omubaara acweriirwe kukomwa ameezi 6 ahabwa shiringi 77,000.
Amutuhaire agambiire kooti ngu akakyera kare omu kasheeshe k’ebiro 09/10/2023 nikwo kwihayo aka ‘drawer’ aku babaire nibabiikamu esente z’ebaara akabaire kari omu kishengye kya manegya nikwo kwihamu shiringi 77,000 akazitwara.
Patience Amutuhaire, omukozi w'omu baara orikugambwa kuba yayibire shiringi 77,000 eza mukama we. . Photo by Stephen Nuwagira.
N’ebya Nuwagira Stephen
IBANDA
Omukozi w’omwishiki w’omu baara acweriirwe kukomwa ameezi 6 omu kihome kya Nyabuhikye ahabw’okwiba sente zirikwingana shiringi 77,000 eza mukama we.
Nyakujunaanwa Patience Amutuhaire akakora ekikorwa eki omu kasheeshe k’ebiro 09/10/2023 aha baara ya NK omuri Kacwampare, Rugoba omu gomborora eya Nyabuhikye omuri Ibanda.
Amutuhaire asingisiibwe omushango gw’okutwara esente za mukama we ataine kwikirizibwa kwona kandi omuramuzi wa kooti ya Ibanda omucweriire kukomwa ameezi 6.
Arikureebukaho omu maisho g’omuramuzi wa koot ya Ibanda, Esther Murungi, agizire ngu nyakuteekateekwaho akabanza kworeka emicwe mibi.
Beitu hoona, Amutuhaire ow’emyaka 21 akaija yayikiriza kuba yakozire omushango ogu bwanyima y’okuhurira obujurizi kuruga aha mujurizi w’okubanza ow’orubaju oruhababi hamwe n’owabaire ari mukama we, Wilbroad Mutabaruka ou yatwire esente ze.
Amutuhaire agambiire kooti ngu akakyera kare omu kasheeshe k’ebiro 09/10/2023 nikwo kwihayo aka ‘drawer’ aku babaire nibabiikamu esente z’ebaara akabaire kari omu kishengye kya manegya nikwo kwihamu shiringi 77,000 akazitwara.
Esente zoona ezi Amutuhaire yabaire aibire zikagaruzibwa mukama waazo (Mutabaruka).
#WestUpdates