Omushaija asingisiibwe omushango gw’okutaahirira ekibira kya gavumenti.

N’ebya Stephen Nuwagira

IBANDA

Richard Mwesigwa, 52, naija kumara ebiro 5 arikukora emirimo ya gavumenti atarikushashurwa bwanyima y’okutaahirira omwanya gwa gavumenti.

Mwesigwa omutuura wa Kitoma, omu gomborora eya Kicuzi aikiriize kuba yakozire omushango ogu omu maisho g’omuramuzi wa kooti ya Ibanda, Esther Murungi.

Omuntu weena orikusingwa omushango gw’ekika nk’eki naaba aine kuheebwa ekifubiro ekikukirayo eky’okushashura shiringi miriyooni 7. Obuhababi nibugira ngu Mwesigwa akashangwa omu kibira kya gavumenti ekya Irimya Forest Reserve “ataine rusa” aha biro 04/07/2023. 

Ahi yakwatiirwe, akaaba yaherize kutema omuti kugusharamu embaaho ataine kwikirizibwa kwona.

Mwesigwa aikiriize omushango ogu kandi Omuramu Murungi amuhaire ekifubiro ky’okukora omurimo gwa burungi bwansi (community service) ogu arikuza kukora kumara ebiro 5.

Ogu naija kuba nakora eshaaha 5 omu eizooba aha mwanya gwona ogwa gavumenti oguri haihi n’ama gye.

Mwesigwa yaaba atakozire ekifubiro ekimuhairwe, naija kugaruka akwatwe kandi naija kukomwa emyaka 7, Okurugiirira ahari Esther Murungi, Omuramuzi wa kooti ya Ibanda.

#WestUpdates