Mukaaga bafeereire omuri butandu aharwa Masaka-Mbarara.

N’ebya John Masaba

KYAZANGA

Abantu 6 bahamiibwe Pooriisi kuba bafeereire omuri butandu ebaire aharuguuto orwa Masaka-Mbarara. Butandu egi ebaire ahari Kirumba omuri Kyazanga nyomwebazyo ebiro 19.08.2024. 

Abantu 37 nibo batungire obuhuta bwanyima ya baasi kutomerana buso bwantaama na FUSO Lorry.

Omugambirizi wa Pooriisi y’eby’ahanguuto, Michael Kananura naagira ngu emotoka ezitomeriine ni baasi ya Gateway ehandiikirwe omu namba ya UBQ 621Z hamwe na FUSO Lorry eya namba UBM 673K. 

Nikigambwa ngu omuvugi wa baasi ku ahikire ahari Kirumba arikuruga ogwa Mbarara arikuza ogwa Masaka yayenda kuraba aha motoka ezindi nikwo kuhendeera etomeriine na FUSO ebaire neruga ogwa Masaka erikuza ogwa Kyazanga”, Kananura arikushoborora.

Nayongyeraho ngu omuri butandu egi hafeeriiremu abashabaazi 6 abarimu n’omuvugi wa baasi. Kananura naagira ngu Pooriisi y’omu kicweka ekyo erahukire kuhika aha mwanya nikwo kwirukangiza abahutiire abarimu n’omuvugi wa FUSO omu marwariro agari haihi kutunga okuragurirwa. 

Kananura naagira ngu emitumbi y’abagyenzi omu kabafu ah’eirwariro erya Kyazanga.

Ahitugiire kuhandiikira amakuru aga, emotoka zombi ezitomeriine zibaire zikiri aha Pooriisi ya Kyazanga obwo okucondooza aha kirugiirireho butandu egi kurikugyenda omu maisho.

Butandu egi neijaho bwanyima ya rupoota ya Pooriisi y’eby’ahanguuto eya buri wiiki kworeka ngu abantu 76 nibo bafeereire omuri butandu z'ahanguuto omu bwire bwa wiiki emwe. 

Okurugiirira ahari Kananura, butandu ezi ezifeeriiremu abantu 76 zibaireho kuruga ebiro 11.08.2024 kuhisya 17.08.2024 omu eihanga ryona. 

Nayongyeraho ngu ahabantu 76 abafeereire omuri za butandu, 24 babaire bari abavugi ba Piki, 19 bari ababaire nibatambuza ebigyere, 16 babaire bari abashabaazi b’ahari za Piki, 5 abavugi b’emotoka n’abandi.

#WestUpdates