Omuvugi na kondakita bakwatwa ahabw’okufa kw’abeegi 2.

N’ebya Eddie Ssejjoba         

SSEMBABULE      
 

Butandu egi ebaire ahari Kikoma aha ruguuto orurikuruga Masaka kuza Ssembabule obu bus ebaire eri aha siipidi y’amaani ehandiikirwe omu namba ya UAU 944B kugambwa kuba etomiire abaishiki 2 barikuzaarwa hamwe obu babaire nibaruga ah’ishomero barikushara oruguuto aha Zebra Crossing.

Omugambirizi wa Pooriisi ahabwa Masaka enkuru, Richard Komakech, naagamba abafiire nka; Marjorine Nabatanzi na Comfort Nakalanzi, ab’ishomero erya Cleveland Nursery and Primary School, Ssembabule.  

Naagira ngu dureeva, Mumbere Asaba, omutuura wa Rubaga omuri Kampala asigireho emotoka bwanyima y’okuheza kutomera abeegi aba beitu abatuura bamwirukireho nikwo kumukwata bakamutwara aha Pooriisi ya Ssembabule.

Komakech naagira ngu kondakita, Wilberforce Mufite- omutuura wa Kabale avugire bus kuruga ahu etomeriire yaagitwara aha Pooriisi bwanyima y’abatuura kutandiika kugiteera amabare n’okwenda kugyosya.

Naagira ngu abantu abaire baine ekiniga kingi omu kuhoora enzigu basisire bimwe aha bicweka bya bus egi ahabw’okufa kw’abeegi aba.

Steven Kamya Kibudiya, Siipika w’egomborora eya Mabindo naagira ngu abatuura banyigire ahabw’abavugi ba bus abaingi n’ebimotoka ebihango kuvuga siipidi erengire n’omu myanya y’etauni aharikuba hari abantu baingi.

#WestUpdates